Maikapat a Paset

"PASADOKA, Miss Ramos," kinuna ni Mr. Daniel Dumayas, manager ti estasion ti radio a nagaplayan ni Rosebel a kas newswriter. "Adda gayam backgroundmo iti panagsurat. Datika gayam a kameng ti pagiwarnak ti kolehto a nagturposam."

"Kasta nga agpayso sir," kinuna ni Rosebel. "Siak idi ti associate editor."

Nagtungtung-ed ti manager. "Ken adda man pay saludsodek, Miss Ramos," bangbangir ti isem ni Mr. Dumayas. "Pudno kadi a mannurat met ti dati a kaayan-ayatmo?"

Limmabbaga ni Rosebel. Di nakatagari.

Nagkatawa ni Mr. Dumayas. "Sorry, Miss Ramos, penpenkek la ngamin ti nadamagko."

Kasla maaw-awanan ni Rosebel idi rummuar iti opisina ti manager. Nakigtot idi adda mangkulding iti abagana. Ni Donna a gayyemna. Reporter ni Donna iti isu met la nga estasion ti radio.

"Apay a kasta manen ti langam, loka, ket naawatka metten?" agkatkatawa ni Donna a nangiturong ken ni Rosebel iti pagpalamiisan.

Imbagana ken ni Donna ti sinaludsod ni Mr. Dumayas.

"Siak ti nangestoria kenkuana," kinuna ni Donna.

"Inimbestigarnak ngamin idi irekomendaka, nadakamatko payen ti lovelifemo. Agkatkatawa ngarud idi naammuanna ti gapu ti nagsinaanyo ken ni Philip."

Alusiisen ni Rosebel iti dayta a rabii. Aglalabbet dagiti mapampanunotna. Malaglagipna ni Philip.

Saan a kabaelan nga ibuksilan dagiti balikas ti panagayatko kenka, Rose. Ngem anian a nagsaem ti masugat kadagita nagita a balikasmo. Nasasaem nga amang ngem ti sugaten ti tadem ti kampilan wenno ti dudogen ti bala ti paltog. Ala, ikarik ngarud a saankan a singaen nupay pasetnaka met ti kalman a nakamulian ti pagtaktakderak ita a pedestal... Paset dayta ti subalit ni Philip idi daydi naudi a surat ni Rosebel a nangpugsatanna iti relasionda iti baro iti panangipagarupna a lipliputan isuna ni Philip.

Nalawag itan ti amin ken ni Rosebel. Dina ngamin maawatan idi ti naggidiatan ti fiction iti pudno a biag. Idi mabasana dagiti estoria ni Philip a maipabpablaak kadagiti nadumaduma a pagbasaan, kas koma iti pannakikanaigna iti nadumaduma a babbai, impagarupna metten a pudno dagitoy. Ket gapu iti nalaus nga imon ken suronna, sinuratanna ni Philip, nagsasawanna daytoy ket pinutednan ti relasionda. Adu a panangilawlawag ken ay-ayo ni Philip. Immay pay rinanta ti baro ni Rosebel. Ngem saan a dinengngeg ti balasang. Inkarina a dinan kayat pay ti makirelasion iti maysa a mannurat a manangallilaw, mananggundaway ken no ania la ditan.

Napalabas ti sumagmamano a tawen, idi naan-anayen ti nakemna, naamiris met la ni Rosebel ti biddutna. Kayatna ti makisinnublianan ken ni Philip ngem rinimbawan ti bain dayta a tarigagayna. Tinagibassitna ti bagina ta establisadon a mannurat ni Philip, nalataken iti intero a pagilian. Ken nalabit saanen a pagan-ano ni Philip ta adu la ketdi ti sabalin a nobia daytoy.

Akuenna a nagbiddut. Ngem no maminsan, dina met la mapabasol ti bagina. Ubing pay la ngamin idi. Naganus pay la ti nakemna a makaamiris ken makautob iti kinakomplikado ti serioso nga ayat.

Kinalikaguman ni Rosebel ti agbalin a mannurat. Ngem nupay padpadasenna a suroten ti kinamannurat ni Philip, inkagumaanna met a linipat ti baro. Kayatna la a padur-asen ti naduktalanna a talentona. Saan a masapul nga inaigna ti tarigagayna nga agbalin a mannurat iti kinatao ni Philip. Ta saanen a nasken a mangnamnama pay ken ni Philip. Saan a nasken nga agbalin a sentimental. Linipatnan daydi karissabong nga ayat a nariknana iti baro. Saan a maymaysa ti lalaki. Insaganana ti nakem ken riknana iti ammona nga adu pay nga oportunidad ken panawen a dumteng. Ammona a masarakannanto met laeng ti talaga a kagasatna.