ravenna 
ni peter la. julian 

Diak ammo ti nagpaingan `di pagaw
Dagullititek ti magna iti nasipnget a pasilio
Ngem makaaliaw ti arimbangaw ken dung-aw.

Yunnoyko iti sallukob ti sardam: agsublika,
Ravenna, awanen ti bagyo: nalangton ti
Karuotan iti minuyongan:

Kasla tudo ti panagtinnag ti lua
Iti patakder-arapaap iti kadaratan: saan a matay
Dagiti lagip ti kayanga a pimmusay:

Agdaranudor ti init, aginit ti bulan
Dara dagiti lua a matnag:
Rurog dagiti agkakanta iti kannag.