ang pag-ibig  
ni daragang  
magayon  
(hango sa alamat ng bulkang mayon)  
ni lorna salvosa agpay  

(Para Sa Aking Handiong,
Sa Simbahang Luma
Daraga, Albay)

Itong simoy ng hanging umaaliw sa akin
Sinugo ko na mahal, upang ika'y sunduin
Sa bawat takbo nitong aking orasan
Nanaginip akong kaharap 'yong larawan

Aking sinta, tanging iniibig
Kalungkota'y lagi nang kaniig
Mula nang magbiro ang kapalaran sa atin
At ika'y ilayo sa aking piling

Handiong, aking sinta,
Sa aking piling, magbalik ka
Itong aking luha, iyong pahirin
Aking pag-ibig, magbalik sa akin

Hawak ko pa mahal, itong ating punyal
Simula nang itarak, lagi nang kaulayaw
Simula nang dumaloy, dugo ng kamatayan
Tangi kong kapiling, bulkang aking libingan

Mahal, magbalik ka, hanguin ako sa aking libingan
Sirain ng pagmamahal, kaytaas na bulkan
Aking sinta, tangi kong pag-ibig
Sirain mong lahat ang sa ati'y balakid

Sa ibabaw nitong kaylungkot na simbahan
Hinihintay pa rin kita, o, aking mahal.