susik 
ni roy v. aragon 

2.
nagsaretset ti maysa a legleg, immasuk,
natnag nga uging manipud iti di naglisi
nga apuy. gumuyguyab latta ti puraw iti papel.
ket tinangad ti alintatao ti kuretret
iti muging. nagpunit dagiti kurimatmat,
naglangoy ti alintatao iti sipnget
a pagkuyamkuyaman ti riniwriw
a kulalanti. ay, addakan, balong,
napipia man? ditoy, balong, ditoyka---

3.
simyag ti dakulap, nanalpiit
iti takiag: naipinas ti lamok
a simmippit, naibudi iti dara.
ket buto ti bolpen nga imlay
iti kasta unay. nginirsian ti puraw
iti papel ti alintatao ken ti muging.
agsublika, balong, umayka, napanamon?

4.
sinippaw ti dakulap ti nagsuek a muging.
liniklikan ti alintatao ti agngiitngiit
a puraw iti papel. namrayanna a kinuyepan
ti baso a plorera iti sanguanan: tallo
a malaylayen a rosas, ngumisiten
a danum, ken dua nga agkulakulagtit
a balbaltik. addakan, balong, sika
kadi daytan?