kadagiti martines
ken kurarapnit
iti kampanario ti
bacarra: datonlagip
(Agosto 8, 1995, Sta. Rita, Bacarra, Ilocos Norte)
ni roy v. aragon

Masikog ti segga iti singin nga iliw: kadaydi a sar-ong
Iti umok ken rukibyo iti reggaay a tangar. Daydi
A panangagekko iti daga ti puseg, puso, muging ken takiag.

Agbarangay ti tao kaniak iti karayan-dakkel.
Dumappat iti sangatakap iti bakir ti napalabas.
Inna itangguap ti basi iti burnay dagiti amma.
Dayyengen ti Bannatiran iti simponia ii i-bacarra
Ken i-vintar ken i-laoag nga arikiak ken anit-ityo
Iti agsapa ken sumipnget ti pannakasarak ken pannakayaw-awan.

Ket masapulak no kua iti saluyot, samak ken alukon
Ti linas. Makarawak no kua iti katuday, dalayap ken rabong
Ti siglot. Itunda no kua dagiti ararawan, alukap ken tukak
Ti amianan. Iti pakbet ken abraw, iti unas, tabako ken bawang
Masiimak no kua ti darudar, ti baggak. Ket masagangko
No kua kadagiti bukto, kippi, udang, dalag ken ballaiba,
Kadagiti bamban, badang, iket ken arado, ti kinaaddak.

Ket ditoyto ken idiay, adda lagip ti ampayagyo.
Anianto ken asino, adda gagar iti kampanario
A di sumuko: dinto maibus ti siglo kadagiti pila ken bato
A kaptan ti dalikepkepyo. Kasanonto ken apay, adda
Nakem a kumarayo: biag-Lam-ang a maidallot iti agnanayon
Ti puso ti awis ken utek ti tawid iti nasaruno ken sumaruno.