Iti kada pannakasirpatko iti ladawam
Sika a perpekto nga imahen ti obramaestra.
Iti isipko karkaritennak dayta isemmo
Dagita kallidmo a makaguyugoy
Gutigotenna ti pusok,
Abbukayenna dagiti panagriknak.
Dagita natubtubay a bibigmo a pagrukbabak,
Ken dayta pakabuklam
Nga ar-arep-epek a mabukodan.
Ti perreng ti mangsulsulbog a matam
Adipenenna ti puso ken kararuak
Tapno agpakaasiak iti aprosmo
Tapno agpalamaak iti pannakipagriknam:
Paayem daytoy a gagem
Ngem iti kinaisangayan ti pakabuklam…
Umasidegka, itdek ti amin a kalikagumam
Subalitak iti apros ti aprosmo,
Ikkatek ti kettang ken duaduam
Perngennak, itundam kaniak
Ti amin a mingmingmo
Iti daytoy a siled a data laeng,
Pukawenta ni panaginkukuna…
'Toy di mabatok a rugso
Ti pannakapnek a a tartarigagayak
Ti kakaro ti darang iti nagbaetanta,
A napasgedan iti apuy
Lunagennak babaen dayta isemmo...
Ayatennak, ikutannak, aprosannak a siaannad...
Surotenka iti papanan dagiti agekmo
Iti mata, iti agong, iti muging, iti timid
Ti kinadursok ti dila ken kinasutil ti bibig
Daliasatenna dagiti barukong,
puseg, murdong ramramay...
Daytoy a kanito innak idaton
A sirarag-o ken sigagartem
Tunggal pulgada ti bagik
Nga inka pagpampanunotan
Taraknem daytoy a lasag,
Pengdam `toy bisin
Subalitam `toy pakasapulak
Dinak bay-an a mawaw
Pagrukbabak unay daytoy a kanito
Ita ken iti agnanayon.
