3. Ni Teresa, agay-ayat latta
NI KAANO man didanto makaruar iti pupokan ti pammati, kinunak kenka sakbay ti pannakapasamak ti kanito a panangkamkamatta kadagiti angesta. Kayatka nga arakupen. Ngem kasano ngata aya ti panangarakup iti maysa nga ay-ayaten a kinawesan ti nilumoten a pagalagadan ti pammati? Your faith, Padre Deus--our faith--is for real!
Ammok, Teresa, ammok, kinunam kaniak. Biroken dagiti nabaked a ramaymo dagiti narapis nga imak ket agsinggalot manen dagiti ngatangata a mangbitbitibit kadata iti indayon dagiti rugso ti sipnget a duata laeng ti makaammo.
Sika ken siak, Padre Deus, iti nailangitan nga ayat. Sika ken siak iti nailangitan ngem maiparit nga ayat.
Ta kasano koma nga ayatenka no diak met matagikua dagiti buteng ken darepdepmo?
Ania a panagtalawataw ni rugso manipud kadagiti ing-ingungoten unay a kanito ti makaited kaniak iti talinaay ni pakinakem? Ania a talinaay ti maagsep kadagita bara a tumrarong manipud iti panakaila ni labus a kinaasinok iti labus met laeng a kinaasinom?
Awan ngarud rason tapno agindegta iti am-ammangaw nga arapaap, kinunak idi kenka, Padre Deus. Inyunay-unayko kenka dayta, di ngamin?
Ania a kaimudingan ti agur-uray kadata, Teresa? Sinaludsodmo ketdi kaniak. Manen ken manen, kasla tiradan a liday ti madlawko kadagiti matam. Agladingitak. Pribado a ladingit.
Ay, wen, ladingit a para kenka.
Ladingit a para met laeng kanniak.
Maysa laeng a banang-es ti insungbatko iti saludsodmo. Adda dagiti rikna a saan a nasken a baliksen. Kas iti riknak maipapan iti masungad nga aldaw. Papanan ngata dagiti sangaribu ket maysa a banang-es malaksid ti panaglansadda iti kaadalman ti naisingkaw a rikna?
Don't we deserve to live? Sinaludsodmo met laeng kenka idi agangay. Addan daytay awanan nagan a bulkan iti barukongko ket mamutbuteng daytoy, mangikarkari iti delubio iti rikna iti ania man a kanito.
Diak koma kayat ti agbalikas. Diak koma kayat ti mangirukit manen kadagiti ngatangatak kenka. Saan a kas karina ti agabito a saan a para iti bukod a pakaragsakan no di ket para iti pakaragsakan dagiti tao a pagserbian. Wen. Saan a kas karina ti mangimaro met iti masakbayan--isandi kadagiti bambanag a daddadakkel nga amang ngem iti bukod a pakapnekan.
Binirokmo dagiti kannayon a balikas ti saludsodko kadagiti lumammiisen a ramayko. Saksi ti ginatangmo a rabii dagiti umel a balikas. Ken saksi met dagiti umel a balikas ti ginatangmo a rabii iti ginatangmo met laeng a siled iti kinaunday ti nasayud laeng nga agpatnag.
Mano pay a panaglemlemmeng, Padre Deus? sinaludsodko kenka.
Mano pay a panagur-uray iti sipnget tapno lamuten ti sipnget ti kinaasinota satanto gumatang iti espasio ken oras iti kinaunday dagiti adu unay a dita ammo maipapan iti masakbayan?
Agalumiim met no kua ti artipisial a lamiis nga ipugpugso ti mababain a berber ti air coditioner iti ginatangmo a siled. Ditoy nga uksotenta dagiti bain, ila, duadua. Ditoy a wayawayaanta dagiti estranghero a rikna tapno birokenda dagiti kaasmangda kadagiti anangsab a tiliwen dagiti makusen a lino ken ipupok ti nakakandado a ridaw.
I am so alone, Teresa, kinunam, ket nakulding ti barukongko.
Motherhood instinct siguro, kayatko nga arakupenka, ibaludka kadagiti imak, isadagko ti ulom iti barukongko. Kayatko nga iti panangisadagko iti ulom, agmuyek ti aringkuloten a buokmo, sagaysayek babaen dagiti ramayko tapno laeng mariknam a siak, ni Teresa, ket kabinnuligmo iti sabali a gerra iti biag, ken siak, ni Teresa, masindadaan nga agsakripisio tapno madaeranta a sarangten ti pangta ti masakbayan.
Ngem dimo insadag ti ulom iti barukongko, Padre Deus. Ket saan met a naan-anay ti nakemko a mangiparipirip kenka ti kaririknak.
Idi un-unana, diak maawatan daytoy a pasamak. Ngem ammok itan: Adda dagiti waig ti rikna a ditay kabaelan a rangtayan.
