aringgawis
ni aurelio s. agcaoili

1
sumariot' pannakaibitin kadkadua
ti aringgawis kinaanak, kinaama
a litupan ti arimukamok iti sardam
kanito a biagen, ipupusay iti ungto
ti amami, kas sandi ti brebario
pannakalukag a ludon panaglamolamo
iti altar, duag dagiti nakupin nga isem
ken dawat a siray ti tellaay, saur
panangunor ikub monasterio-rabang,
misterio nga ininaw panagkalap
iti sumipnget, panagatab iti lenned
ti agmatuon a pakaiwawaan ti lames
iti sanktuario
dagiti kinelleng a pagpidutan iti asi,
teddat' burburtia a ditoy nga aggudua
ti ayug dagiti billit-tuleng, nota
a sumuknor iti ngudo ti pluma, puraw,
berde, nalabaga a paulo ti biag
iti tangatang, mangsebseb iti uram
a mamaglunit palimed ti gawed-bua, kired
a naigamer iti atang
naikari a pangay-ayo iti napadara a pluma
ti kinamaymaysa ti aringgawis, buya
a di masirpat dagiti ubbing ken lallakay,
sabong ti sairo, kandela ti anghel
ti pintas, kasingin ti apgad
maipadawat nga ayat

2
musika ti lasonglasong a kumamang
iti altar, kaputed ti batingting
a pakdaar iti yaay, pannakagteng
nga agtungpal iti isisina ti alimbubuyog
iti arakup ti busel, bangbanglo ti dios,
ardiod dagiti rebulto, di makaebkas

3
tuparen latta ti baybay ti sellang
ti monasterio-rabang, ayuyang ti engkanto
a di umin-inum, di mangmangan