maika-5 a paset
ADDAN ni Cedrick! Nabayagen a naibaba ni Joyce ti awditibo ti telepono ngem kasla nakatingtinggaw pay la ti timek ni Cedrick a mangmangngegna. Addan. Sangsangpetna kano manipud Saudi. Agdaldalagudog ti barukong ni Joyce itay makipatpatang iti telepono ngem pinilitna a di madlaw dagiti kaopisinaanna; wenno maammuanda no asino ti kasarsaritana. Indawatna ken ni Cedrick nga agsaodanto iti sabali a gundaway. Naglagaw itay kalikaguman ni Cedrick ti yuumayna kano ditoy opisina ta sukonenna ni Joyce. Nagpakaasi ni Joyce a di patuloyen ni Cedrick. Nagaligagaw iti mabalin a mapasamak no agsasarakda a tallo kada Sadiri ditoy. Ket indawat ni Cedrick nga agkitada ken ni Joyce ita met la a malem ta kayatna nga agsaritada. Imbaga ni Cedrick nga aguray daytoy iti sigud a lugar nga ayuyangda idi. Di nakapagkedked ni Joyce. Diosko! apay a nagawid? Ania ti kayatna a mapasamak? Aniat' aramidek? Aniat' aramidek?
Panagaawidan. Alinduaen pay la ni Joyce no makisinnarak ken ni Cedrick. Ngem nupay maam-amak ti riknana, kayatna met a makasango ni Cedrick. Pormal a makasao. Makilinnawag. Bareng no marisuten ti problemada. Ken kayatna, wen, ta dina mailibak: adda seggana, saan la segga, iliw, mailiw a makakita ken ni Cedrick. Ni Cedrick, ti dati a nobiona iti agarup walo a tawen. Ngem kasdi a maamak iti dayta a panunot...
Addan iti ground floor, sinipsiputanna dagiti empleado a yula ti elevator. Kasla tagibutngen ni Joyce a makita ita ni Sadiri nga agop-opisina iti ngatuenda a kadsaaran. Awan. Nalabit, agobertaim manen. Wenno agpapaudi man ngatan, ammo ni Joyce, tapno mawayaan laeng ket maliklikan ti panagdennada; naynay pay la a sukonen-itulod ni Sadiri. Pammarang a relasion? Tagisaemen met ni Joyce. Ngem nalaglag-an ken ni Joyce a dida pay la aginnasideg ken ni Sadiri. Ta patien ni Joyce: ad-adda a nasaem no aginnasidegda ken ni Sadiri ngem adda met nalawa a yuyeng iti baetda.
Rimmuar iti pasdek. Limmugan iti agdadaan a taksi ket nagpaitulod iti lugar a pagur-urayan ni Cedrick. Dimmikar ti kebbakebba ni Joyce idi sangsanguennan ti dakkel ken sikat a panganan ken paginuman a tumannawag iti baybay. Paboritoda idi a papanan ken ni Cedrick lalo no kastoy a mumalem wenno sumipnget ta buyaenda ti ilelennek ti init bayat ti pannanganda. Nagsarungaddeng. Sinuknor ti buteng.
"Joyce!" pamiliar unay a timek manipud iti likudanna.
Tinaliawna. Apagapaman a naimayeng ni Joyce, naidarekdek. Addayta, ni Cedrick, sigud a kaayan-ayatna. Umis-isem, adda di mailadawan a rag-o-gagar kadagiti matana. Di nagbaliw: nataer, natayag, nabisked latta a lalaki. Nga aminen ni Joyce a maysa met a nakakayawan idi ti agtutubo a pusona. Adtoy manen 'toy lalaki nga impampannakkelna met idi kadagiti am-ammona a babai a di mailibak nga ag-crush idi ken ni Cedrick: tsinito a mata, napuskol a kiday, natundiris nga agong, naingpis a bigote, namsek a bibig, panguloten-agallo-allon a buok. Ket ita, nakatartaraki, nakapumpuner iti balbag a kamisadentrona ken puraw a pantalonna, nangisit a lalat a sapatos ken pinangayed dagiti suotna nga alahas.
"C-Cedrick..." nayesngaw laeng ni Joyce.
"Agyamanak! Agyamanak unay ta immayka, Joyce! Nabayagakon nga agur-uray. Anyway, I understand, sobra metten ti trapik ita. Uray ta impareserbakon 'diay dati a paboritota a lamisaan. Remember? Kasulian ngem the most cozy and most lovable, just beside the glass wall overlooking at the sea! Ammok a dinak paayen, Joyce. Intan dita uneg!" Ket inattibayen ni Cedrick ti maikulkuleng pay la a balasang.
Agsangsangodan, ur-urayenda dagiti orderda, wenno inorder ni Cedrick. Tengtenglen pay la ni Joyce ti riknana ket nakakaammon ni Cedrick. Dagiti met la dati a naynayda idi nga orderen a taraon. Di malipatan ni Cedrick. Ket matukay ni Joyce nupay agar-aripapa ti riknana.
"Hey, agminnulenglengta kadi lattan, Joyce?" inrugi ni Cedrick. "Dika koma maikawa. Please feel the same. Kas idi, kas ita, Joyce."
Ngem sabalin ti ita! Sabalin! Naglabasen ti idi! Kayat nga ipetteng ni Joyce. Agsasanggala ti buteng, danag, segga, pammabasol, lagip, lag-lagip iti unegna.
"By the way, kumustaka itan?" kasual a kinuna ni Cedrick a sipeperreng latta iti balasang. "Kumustan 'di sigud a kaayan-ayatko? 'Di ay-ayatek? Mag-an ngay ti asidegen nga agkallaysa?"
"Cedrick, pangngaasim, no ania ti nasken a pagsaritaanta ita, I want it straight to the point. Lawlawagenta. Sakbay a mangbukelka iti konklusion..."
"I'm sorry, diak ranta a sairenka," tiniliw ni Cedrick ti ima ni Joyce iti lamisaan, napnuan dungngo a nangappupo itoy. Kayat a lapsuten ni Joyce ti imana ngem kasla nabibineg.
"Your letter, isut' pettat a nangpaawid kaniak, Joyce," kinuna ni Cedrick. "I'm shocked of it. Diak maako a nilokonata ni Sadiri. It's so unfair. Isu a nagawidak. Tapno marisut ti amin. Joyce...."
"Ngem insuratko la ti amin tapno maammuam, Cedrick," kinuna ni Joyce. "As simple as that. To justify things. Tapno mailawlawagko met ti biangko. A nagbiddutka kadagiti impapanmo kaniak. Sinuratanka, ngem awanen panggepko a sabali. Diak dinawat nga umayka."
"Joyce... Joyce, diak mamati nga awan naun-uneg a gapu ti panagsuratmo," pinetpetan ni Cedrick ti dakulap ti balasang. "Ammok, ammok nga—"
"Agipapanka latta iti kaykayatmo, Cedrick," inyagaw ni Joyce, "ngem uray pay ngata--saanen a mabalin. Nalabit, ti kasayaatan a maaramid ket awatentan ti kinapudno--tapno marisuten a maminpinsan ti amin--a dita a talaga agkagasat... Wen, Cedrick, agkallaysaakon, maikallaysan iti mabiit."
Inibbatan ni Cedrick ti dakulap ni Joyce. Nangmesmes. Adda kasla dina mairukuas a rikna nga agwagwagteng iti unegna, napatak ken ni Joyce.
"Diak pay met maako ti panangallilaw kaniak ni Sadiri," kinuna ni Joyce. "Mariribukanak iti agdama. Ngem ammok a maawatakto met laeng ta diakon maibabawi. Nga uray pay no kayatko ti agbabawi kenkuana, saankon a maaramid, Cedrick. Saanen..."
"Ngem ania a gapu, Joyce? Gapu ta ay-ayatem? Wenno gapu laeng ta napasubokan? Naikumitkan a maikallaysa? Ken gapu kadi ta talaga a dinakon ay-ayaten wenno maayat pay, Joyce, ha, Joyce? Sawem man, sawem man!"
Di madaeran ni Joyce ti sidir ti balikas ken perreng ni Cedrick. Namrayanna nga imbaw-ing dagiti matana iti adayo, sadiay, iti baybay a tabonanen ti init.
"Agliblibakka, ammok. Ngem dimo mailimed kaniak. You still care for me, Joyce! Ala, wen, committedkan, ikallaysanakan ni Sadiri--ngem ammok, I'm sure, ay-ayatennak pay laeng. Ay-ayatennak latta, Joyce, dimo koman ilibak!"
Di nagkir-in ni nagtimek ni Joyce.
"Ket ammom, Joyce, no apay a nagawidak? Tuntonek ti karbengak! Ay-ayatenka, Joyce! Ay-ayatenka latta! Ket immayak tapno ikalintegak ti ayatko! Ilabanko, irupirko, Joyce, uray aniat' mapaspasamak!"
Adda kasla aligaget a nangbagkat ken ni Joyce. "C-Cedrick... Please just accept it, saanen a mabalin... Saanen..."
"Joyce, look, apay koma a saan? Data ti agayan-ayat! Dinadaelnata laeng ni Sadiri. Ita, naammuantan a nilokonata. Apay koma a din mabalin? Data manen, Joyce! Data pay laeng! It's all the same!"
"Ngem dikan ay-ayaten, Cedrick..." di napuotan nga insawang ni Joyce.
Napaumel ni Cedrick. Immirteng ti rupana.
"Apay ngamin a sinuboknak, Cedrick? Diak met maawat dayta nga inaramidmo. Dinak pinagtalkan--dinak pagtalkan--ket kasano ita a masiguradom nga ay-ayatenka pay laeng?" rumagutok ti barukong ni Joyce. Nawayaanna met laeng ti kayatna nga iparupa ken ni Cedrick.
Di latta nakasungbat ni Cedrick. Immanges-anges.
Intuloy ni Joyce: "Kunaek a basolmo met la ti amin, Cedrick. It's all your plan. It's all your making."
Nagsennaay ni Cedrick. "Wen, wen, akuek, Joyce, basolko. All my fault. Nagduduaak kenka. Akuek, nabaybay-anka gapu iti panangipasnekko iti trabahok, iti ayatko a makaurnong. Ket isu met a nagamakak a dinakon patpatgen a nakapanunotak a subokenka. Kayatko la ngamin a masiguro nga ay-ayatennak latta. Ta diak kayat a mapukawka. I'm sorry, I'm very sorry no agduaduaak idi. Forgive me. Ngem nagtalekak kenka. Agtalekak nga ay-ayatennak. Agingga ita, Joyce, agtalekak."
"Kaniak, Cedrick, saan a barengbareng ti ayat. Saan a mabalin a piliten wenno manipularen. Napudnoak nga agayat ngem iti maikari nga ayatek."
"Ngem inayatnak, Joyce! Inay-ayatnak. Awan kadin daydi nga ayat? Nayakaren iti sabali? Wenno gapu kadi ta nagduaduaak ket pinukawmon a naminpinsan? Awan kadin karbengak? Dinak kadin maayat? Dinak kadin ikkan iti maysa pay a gundaway? Sawem man, Joyce, sawem man?"
Ulimek.
"Joyce?"
"Dikan ay-ayaten, Cedrick..."
Naimayeng ni Cedrick. Ngem idi kuan, kinunana: "Masaom la dayta, Joyce, masaom laeng. Ngem awan iti riknam, ammok. Agliblibakka, kunak met, Joyce, agliblibakka laeng."
Ulimek.
Ulimek manen.
Ulimek latta.
Ulimek pay.
Saanen a nakateppel ni Cedrick: "Okey, sige, saannakon nga ay-ayaten, all right. Ta nagbasolak. Ta nagduaduaak. Ket narigatnakon a maawatan ken mapakawan. Nga ayaten pay. All right. Okey. Ket ni Sadiri, isu ngarud ti ay-ayatem, di kadi, ha, Joyce? Ni Sadiri ti ay-ayatem, ni Sadiri, Joyce?"
No apay met a di masungbatan ni Joyce. Nagrigat. Kabaelanna a yesngaw a dinan ay-ayaten ni Cedrick ngem dina ammo no apay a dina kabaelan a yesngaw a dina metten ay-ayaten ni Sadiri. Wenno ibaga a daytoy ti ay-ayatenna.
"Joyce, I'm confident, anyway," pinerreng ni Cedrick. Nalukayen ti rupa ni Cedrick, maraisem ket adda rag-o kadagiti matana. "Maawatko met ket no pudno a dinakon ay-ayaten. But I'll insist myself, my right and my love because I know, uray no ulit-ulitem a sawen a dinakon ay-ayaten, you still care, you still love me, kinapudnona!"
Immanges ti nauneg ni Joyce. Kayatna ti makidinniskutir ken ni Cedrick ngem naamirisna nga awan pagmamaayanna. Natibker ti baro iti pammatina. Nautob ni Joyce: desididon ni Cedrick, desperadon, a ma-ngipapilit iti kunkunana a karbenganna a mangsubbot kenkuana manipud ken ni Sadiri!
"Dika puersaen, Joyce," kinuna ni Cedrick idi aga-ngay. "And I'll not trouble you. Have your time. Meanwhile, selebraranta ketdi daytoy a panagkitata. It's a reunion. Let's enjoy. Addaytan dagiti orderta... Don't worry, itulodkan no malpasta ditoy."
sumaruno a pahina
