hunio 1998
s a l a y s a y
Filipina
ni Johnny Escobar Atiburcio
Iti Sentenario,
Wayawaya
ken Panagwaywayas
ni Roy V. Aragon
Dagiti Umuna
a Maingel a Filipino
ni Juan Quinto Gonzales
Ti Daniw
ket para kadagiti
Maidaddadanes
ken Mapapaidaman
ni Aurelio S. Agcaoili
o p i n i o n
Nadumaduma
a Panirigan
s a r i t a
No Dumuklos
Dagiti Allawig
ni Art Tolentino Ignacio
d a n i w
Hunio Dose
Ni Nawaya
ni Roy V. Aragon
Lussok
nga Ungot
ni Gladys Menor
Pluma: Siit
ken Rosas
ni Amado Yoro
Saludsod
ni Bert Pagarigan
Testamento
ti Ulila a kari
ni Aurelio S. Agcaoili
Allaalla
ni John B. Buhay
n o b e l a
No Duduaem Pay (5)
ni Roy V. Aragon
g a l e r i a
Sumagmamano Nga Ala 2
ni Roy V. Aragon
k d p y
Pakpakatawa
ni Andy Barroga
Makipagayam
|
|
Agduduma
a panirigan
manipud iti
Dap-ayan ti Burnay E-zine
[Pakauna: Dagiti sumaganad ket bukod a kapanunotan dagiti autor. Naadawda manipud iti Dap-ayan ti Burnay E-zine ngem iti pannakaipablaakda ditoy (iti chronological a panagsasaganad), pinilimi dagiti patienmi a maikanatad a paset wenno excerpt ket sitatalinaed ti orihinal. Ti laeng espeling ken grammar ti nabaliwan kas mayalubog iti estilo ti Burnay E-zine. --Dagiti Editor]
...Iti pannakaitanem ni sigud a Pangulo Ferdinand Marcos iti Libingan ng mga Bayani, iti kinabannuarna, ken ni Erap, ken ni Cory, kdpy...
Panirigan ni Jun Mongcal, jmongcal@usa.net
Nai-post idi 6/20/98
Kadakayo amin nga Ilocanos, apay nga adda Ilokano kontra ken ni Apo Presidente Ferdinand E. Marcos? Masdaawak man. Nasken koma ketdi nga agkakaysatayo a mangisakit ken ni Apo Marcos nga isu a makunkuna a greatest Ilocano ever. Saankayo a pudpudno nga Ilokano no kagurayo ni Apo Marcos wenno dagiti ag-Marcos. Para kadagiti Ilokano, maysa a madaydayaw a Pangulo ken naindaklan a bannuar ni Apo Ferdie Marcos a maipagtangsit ti puli ken kaputotan nga IloKano! Agbiag dagiti pudno nga Ilokano! Agbiag ni Apo FM! Agbiag dagiti Marcos!
Panirigan ni Solid North, walapa@po.com
Nai-post idi 6/21/98
Uray pay ania ti sasawenyo, basta kaniak ket maysa a naindaklan a banuar ni Apo Marcos a rebbengna laeng a marespetar ken maikkan iti pammadayaw. Karbenganna la unay ti maitanem iti Libingan ng mga Bayani ket awan man makitak a biddut no maipumpon sadiay ket umno laeng ti desision ni Apo Erap Estrada a mangipalubos a mangitanem iti bangkay ni Apo Marcos (iti Libingan ng mga Bayani) ta karbenganna dayta kas Presidente a pinili ti kaaduan a botante itay Mayo 11.
[Ti sumaganad a kapanunotan ket sungbat ni Apo Ric E.T. Hawaii iti maysa a post ni Apo Contra Macoy. Naedit ti sumagmamano a pannakaisawangna kas mayannurot iti pannakaiparangna ditoy. Saan a nakuti ti orihinal a mensahena. --Dagiti Editor]
Panirigan ni Ric E.T. Hawaii, agnes@hgea.org
Nai-post idi 6/23/98
Saanak a mamati a puppet ti America daydi Apo Marcos. Idi damo, saan a basta makapagpisipis ni Apo Marcos gapu ta nabileg ti Amerika. Laglag met ngamin dagiti nagkakauna a presidente ta inabuloyanda ti panangipasdek ti America kadagiti dadakkel a kampo ti armada. Dayta ti gapuna a kasla adda wayawaya ti Filipinas manipud kadagiti Amerikano, ngem iti kinaagpaysona ket awan.
Kas iti chess, kanayon a ripriputen ti America ti presidente ti Filipinas. Adda dayta US AIDE a pangal-allilawda. Gapu iti dayta, nagbalin ti Filipinas a nakasadag iti America. Naalian met ti mentalidad dagiti umili. Nangato unay ti panagkitada iti Amerika.
Gapu amin kadagitoy, narigatan ni Apo Marcos a mangbaliw iti relasionna iti America. Ngem in-inut a nakapisipis:
- Impapilit ni Apo Marcos nga agbayad ti America iti renta wenno abang. Saanna a kinayat ti masao a US-AIDE kas sulnit ti panagtalinaed dagiti US Bases iti Filipinas.
- Impapilit pay ni Apo Marcos ti pannakaiyababa ti panagtalinaed dagiti US Bases iti Filipinas.
- Impapilit pay ni Apo Marcos a laksiden ti Filipinas ti July 4 a kas pannakawayawaya ti Filipinas. Dayta ti gapuna a June 12 itan ti pannakarambak ti wayawaya ti pagilian. (Naselebraran daytoy sentenario ti wayawaya itay nabiit. Ni Apo Marcos ti nangirupir iti daytoy June 12.)
Dagitoy a kinamalalaki ni Apo Marcos ti nagsagabaan ti America iti nainlubongan a pannakaibabain. Napingasan ti tangig dagiti Amerikano! Ita, kasano a kunaentayo a puppet ti America ni Apo Marcos?
Panirigan ni Contra Macoy, kabusor@eudoramail.com
Nai-post idi 6/24/98
[Daytoy a kapanunotan ket sungbat met ni Apo Contra Macoy iti kinuna ni Apo Ric E.T. Hawaii iti ngato. --Dagiti Editor]
Ti ammok ket daydi Presidente (Diosdado) Macapagal ti nangideklara a masapul a Hunio 12 ti maselebraran, saan a ni Marcos.
Agpayso nga awan pudpudno a wayawaya ti Filipinas manipud kadagiti Amerikano, sinsinan daydi Hulio 4, 1946 a deklarasion. Ket aminen a nagpresidente manipud idi ket makuna a puppet ti Amerikano agraman ni Marcos, aglalo daydi Presidente Ramon Magsaysay. Ngem kakaruan a puppet ni Marcos isu nga adda idi maaw-awagan iti US-Marcos dictatorship ta ni Marcos (ket) isu ti bambanti dagiti Amerikano. ... Awanan(tayo iti) pudno a wayawaya kadagiti Amerikano ket siempre kangrunaan amin daydiay presidente nga awanan wayawaya ta isu ti inda tenglen.
Saan a pulos nakapisipis ni Marcos. Aginggana ngarud iti maudi nga or-orasna iti Malacaņang ket Amerika ti kamangna, ken ni Reagan a dimmawdawat iti desision ket awan ti naaramidanna idi ipanaw dagiti Amerikano nga ipan dita Hawaii, piman.
Awan naaramidan kabayatan ti panagturay ni Marcos a mapapanaw dagiti US (Military) Bases agsipud ta tengngel met ni Marcos ti Kongreso ket tengngel met ti America ni Marcos. Idi laeng panawen ni Cory a napapanaw dagiti US Bases (agsipud ta) nawaya idi ti Kongreso, saan a matengngel ni Cory ta saan met a diktadora isuna uray pay puppet met (isuna) ti US.
Adu ti pammaneknek. [Ti dakdakamaten ditoy ni Apo Contra Macoy ket ti saludsod ni Apo Ric E.T. Hawaii a "kasano a kunaentayo a puppet ti America ni Apo Marcos?"] Maysa ditoy ti libro a "Waltzing with a Dictator. The Marcoses and the Making of American Policy" a sinurat ni Raymond Bonner. Kastoy ti linaon daytoy a libro: "A forceful account of American foreign policy and a twenty-year relationship with Ferdinand Marcos based on more than 3,000 previously classified US government documents and interviews with scores of politicians, diplomats, intelligence officers and military officials."
Panirigan ni Ric E. T. Hawaii, agnes@hgea.org
Nai-post idi 6/26/98
Kadagiti (kontra ken ni Apo Marcos), sungbatanyo man dagitoy:
- Ania ti makuna a bannuar?
- Ania ti makuna a kriminal?
- Siasino ti addaan karbengan a manggedeng no bannuar wenno kriminal ti maysa a tao, dagiti umili wenno ti korte?
- No umili ti pagrukodan, kasano a marukod wenno maka-conclude, babaen kadagiti agprotesta iti kalsada wenno babaen ti panagbutos?
- No korte, agtalekkayo kadi iti korte a pinili ti presidente dagiti agtakem a hues?
- No pudno a pinapatay ni Emilio Aguinaldo ni Andres Bonifacio idiay Maragondon, ania ti panangipagarupyo ken ni Aguinaldo, maysa kadi a bannuar wenno maysa a kriminal?
Panirigan ni Contra Macoy, kabusor@eudoramail.com
Nai-post idi 6/27/98
[Sungbat met ni Apo Contra Macoy kadagiti saludsod ni Apo Ric E.T. Hawaii iti ngato. --Dagiti Editor]
1. Dagiti makuna a banuar para kaniak la a maysa ket isuda dagiti tao a nangibuis iti biag ken amin a panawen ken panunotna para iti pagsayaatan ti ilina ken dagiti umili, kas koma ni Rizal, Bonifacio ken dadduma pay a nakirupak para iti wayawaya ti pagilian ken dagiti tattao. A dagitoy a bannuar ket bigbigen ken akseptaren ti amin a Filipino kas bannuar.
2. Dagitay nagaramid iti krimen kas kadagiti pimmapatay, nagtacaw, nagidadanes, nagabuso, nag-rape, etc.
3. Panagkunak ket isuda a dua. Ngem siasino kadi iti nangeddeng kada Rizal, Bonifacio, Mabini ken dadduma pay a bannuar? Panagkunak pay ket ti historia ti mangeddeng, kasta met nga aramid iti pakakitaan. Saan a mapangnamnamaan ti korte ta siak la (a maysa) ket awan (panagtalekko) kadagiti abogado wennu hues. Ti abogado ket uray no ammonan a sibabasol ti klientena ket inna latta a salsalakniban gapu laeng iti kuarta ket inna nga ilablaban ti kinakillo a di ket (koma) kinalinteg. Ngem agbilibak met kadagiti abogado a di mangayon iti kinakillo.
4. Ammok nga iti issue a Marcos ti sasawem ditoy. Dagidiay agprotprotesta iti kalsada ket makuna (laeng) a tip of the iceberg iti karirikna ti kaaduan nga umili. Saan a pagrukodan dagiti agprotesta a makita iti kalsada wenno parke. Adu dagiti uray saan a mapan iti kalsada nga agprotesta met iti un-unegda ken pampanunotda. (Iti met) panagbotos, narugit ti kita iti eleksion iti Filipinas isu a saan a mapangnamnamaan. Uray dagidiay botos ni Erap, kasla met la botos ni (Robert) Jaworski wenno (Tito) Sotto wennu Vilma Santos (mayor ita iti Lipa City, Batangas) dagidiay ta `diay kandidato ket sikat a tao nga ammo ti uray siasinoman.
5. Kas nakunakon awan talekko kadagita abogado ken hues.
6. Ni Aguinaldo, para kaniak, ket maysa a traidor iti rebolusion, maysa a kriminal a saan a rumbeng a (maawagan iti nailian) bannuar. Ni Aguinaldo (ket) isu ti umuna a diktador, saan a presidente. Saan a ni Aguinaldo ti mismo a nangpapatay kada Andres ken Procopio Bonifacio ngem bilinna a mapapatay dagitoy isu a maysa ni Aguinaldo a kriminal uray pay adu met iti naaramidanna iti pannakilaban kadagiti Kastila. Nasken koma a maikkat ti rupa ni Aguinaldo kadagiti kuarta ta saan a maikari isuna a kas ken ni Marcos a diktador ken kriminal. Diyo ammo dita Ilocos a barito pay la ni Marcos ket maysan a kriminal ta inna pinaltogan ni Julio Nalundasan a kalaban ni tatangna a Mariano iti politika?
Isu a ni Marcos, (para kaniak, ket) kriminal. Ngem (ketdi) kunaek met a bannuar ta isu ti bannuar dagiti dadduma a nagsagrap iti adu a grasia idi panawenna. Bannuar laeng para kadakayo ket saan a (para) iti intero a Filipino. Ta no bannuar koma ket akseptaren koma ngarud ti amin-amin a Filipino a bannuar isuna. Ngem agingga a saan nga akseptaren ti amin a bannuar ni Marcos, saanto la ketdi a naan-anay a bannuar kas iti kinabannuar da Rizal, Bonifacio ken dadduma pay.
(Ti letrato iti uneg ti Marcos mausoleum ket ala ni Stephen Wallace. Ti naka-inset a ladawan ket manipud iti "Sandaan," maysa a pang-Centennial nga album ti kankanta a Filipino)
|
|
