Ket pinadpadaananen ni Sadiri daytoy a panagsa-ngoda ken ni Cedrick. Nupay kasta, naisem, naganaygay ken naparato kas iti sigud ti Cedrick a pinasangbayna. Awan nadlaw ni Sadiri a reserbasion ni Cedrick. Wenno no adda man, naidalimanek a nalaing ni Cedrick iti un-unegna ket di madlaw. Kasda met la iti sigud a nadekket a nagkinnumusta . Dinayaw ni Cedrick ti balay ni Sadiri, dagiti pundarna nga alikamen, ti napintas a saadna iti trabaho. Ngem idi kablaawan ni Cedrick ti umadanin a panagkallaysana, nadlawen ni Sadiri ti pasagid.

"No aniat' kunam, Sadiri, yawisko koma ti iruruarta ita. Medio i-celebrateta man met daytoy a panagkitata over some mugs of draft beer or a bottle of scotch. Inta kadagiti sigud a pappapananta. I guess, we have a lot of things to talk."

"Nice idea," kinuna ni Sadiri. "Ngem ania ngata no ditoyta laengen balay? Anyway, adu ti lebbenko a frozen beer-in-can iti ref. Wenno no hard ti kayatmo, adda met dagiti collectionko--scotch, brandy, dry gin, whisky, rhum, cognac, vodka--agpilika! Pulotan? Adu ti mabalin nga iluto wenno luktan. Mas makapagsaritata siguro a nawaya ken nalaing ditoy, I guess."

"Sabagay, just like the old times," nagliad ni Cedrick iti sopa.

Di mabayag, pagsangsanguandan ti long necked a Chivas Regal a pinaluktan ni Cedrick ken ti lapulapu nga inasar ni Sadiri.

"Diakon agpalpalikaw, Sadiri," inrugi ni Cedrick idi makatallodan a shot. "Patiek, ammom unayen no apay a rinantaka. No apay a pettat a nagawidak. Naammuakon ti amin. Kayatko nga ibatad, Sadiri, a diak maawat ti i-naramidmo. Well, it's alright, don't worry, diak immay ita tapno makisubang. Immayak a makilinnawag, Sadiri. Masapul a marisut ti amin. For old time's sake, friend, pagpatanganta a natakneng."

"Agyamanak, Cedrick," kinuna ni Sadiri. "Ket sapay ta makapagkinnaawatanta ket maiwakasen dagitoy a parikut."

"Sadiri, don't mind if I'll be frank and straight," tinuyagan ni Cedrick ti basona iti arak, pinisokanna iti icecubes, "ta kunaek a traidorka a gayyem--diak mautob no apay a naaramidmo kaniak ti kasdiay. Nagtalekak kenka, sobra a talek."

Intanguap ni Sadiri ti linaon ti basona sa nagsao: "Diak ammo no maawatmo ti panangdawatko iti simple a sorry ken pasensia, Cedrick. Ngem dayta laeng ti mabaelak. Diak ngamin kayat a pagbabawyan ti amin. I'm sorry. Ala wen, liniputanka, sika a bestfriendko. Wen, traidorak. Wen, nagbasolak. Ngem maawatannak koma--ay-ayatek la ngamin unay ni Joyce. I'm desperate then. I was crazy. Isu a naminpinsan a sinamantalak ti intedmo a gundaway. I wanted then to be very sure. Isu a diakon sinamira uray madadael ti panagpagayamta, Cedrick. And I'm sorry about it. Really, I'm sorry."

Nagtungtung-ed ni Cedrick. "So, you're justifying your crime, Sadiri. Okey, that was it, that's it. Ngem kasanoak met la ngaruden? Kasano met a simple nga akseptarek lattan ti amin? There's the crime--ngem awan kadi ti mapabasol? Ti mausig? Ti makedngan? Ti madusa? It's not just, Sadiri, it's not fair. Rebbengna laeng a kalikagumak met, a gun-odek met, ti bukodko a justification!"

"Ket ania ti kayatmo a mapasamak, Cedrick?"

Pinerreng ni Cedrick. "I want Joyce back, Sadiri. Ay-ayatek unay. Diak agtalna. Diak malipatan. Dakami ti rumbeng nga agkallaysa."

Namrayan ni Sadiri a kinilnokilno ti icecube iti basona.

"Sorry, Sadiri," sarkastiko ti isem ni Cedrick. "Siguro, simple met la a sorry ket mabalinen. Naikeddengkon: pasubliek ni Joyce. Ikagumaak. And I'm optimistic enough. Ammok ay-ayatennak pay la ni Joyce."

"Ammom, Cedrick? Kasano nga ammom? Ipakpakaasik: awatem koman ti kinapudno. Bay-annakamin. Siakon ti ay-ayaten ni Joyce."

"Siak, siak ti ay-ayatenna," kinuna ni Cedrick, tinuyaganna manen iti arak ti basona. "Siak ti nobiona. You know, Sadiri, simmingitka laeng. Okey, mabalin nga inayatnaka met ni Joyce. Ngem come to think of it a gapu la dayta iti gurana kaniak ta pinerdinak kenkuana. Ket dinaka koma inaklon no dinak pinardaya. Ket ita ta naammuanna nga inallilawmo, a dinadaelmo laeng ti relasionmi, siak manen ti ay-ayatenna. Siak manen, siak met laeng!"

"Ni Joyce, Cedrick, am-ammok unay--perhaps more than you ever know her. Ket ammok, siak ti ay-ayatenna. Siak ti agdama ken masakbayanna. Ket sika, Cedrick, addaka laengen iti napalabasna."

"Ti ket ammok ken patiek, Sadiri, ket siak ti napalabas, ti agdama ken ti masakbayan ni Joyce! Nailaw-an la kenka! Dinaka koma inaklon no dinak inusar! Dinaka koma inayat!" Nakalablabbasiten ni Cedrick. Naguduadan ti Chivas Regal.

"Pinardayaka man ken saan, inayatnak latta ni Joyce, Cedrick. Ammok dayta. Siwawaya a nangaklon kaniak. Sipapabus-oy ti ayatna. Binaybay-am ngamin. Dimo pinagtalkan. Dinuduam ti ayatna. Intungtongkuam. Isu a siak ti inayatna. Wen, inayatnaka idi, ngem itan, saanen. Ket utobem kadi, Cedrick, a no talaga nga ay-ayatennaka koma, dinak koma inaklon uray kasano ti panangpadakesko kenka. Isu a talaga nga inayatnak agingga ita!"

Ulimek. Pinagsasaruno ni Cedrick ti nagitanguap. Timtimtiman laeng ni Sadiri ti arakna.

"Agtalekak latta, Sadiri. Siak pay laeng ti ay-ayatenna," kinuna ni Cedrick idi agangay. "Ket ay-ayatek met. Irupirko ti kalintegak. Karbengak a sublien. Isu a pasensiakan, Sadiri. Immayak tapno agsinnubliankami. Diak immay tapno mangriribuk wenno mangagaw--immayak tapno subbotek laeng ti talaga a kukuak!"

"Ngem makaawatka koma met, Cedrick. Dimo koman ipilit ti bagim. Agkallaysakamin, wen, please try to be fair and considerate enough."

Nagngirsi ni Cedrick. "Ti gasangna ta diak maako. Pinadaskon nga awaten lattan ngem diak kabaelan. Ah, nagrigat! Nagrigat! No irasonmo ti ayat, irasonko met ti ayat! No ay-ayatem, ay-ayatek met! No naaramidmo ti amin gapu iti ayat, maaramidko met iti amin gapu iti ayat! I'm desperate, too! I'm crazy, too! And so, I don't care if you're going to get married soon! Lapdak dayta a kallaysa! I'm sorry, ngem sika ngamin ti nangrugi iti amin, Sadiri. Ket siak met ti mangleppas. I'll get even! Dinak koma mapabpabasol no kastoyak ita, maawatannak, Sadiri, no sika met ti agsaad iti situasionko..."

"You're selfish, Cedrick. You don't want to understand. Ipagpagapum koma a naplanon, naisaganan ti amin iti kallaysami. Dakkel a pakaibabainan ken riribuk ti mapasamak no di matuloy, I'm afraid..."

"Ah! Look who's talking, Sadiri! Look! Sika ti immuna--ammom a naplanomi met idin ti kasarmi ken Joyce ket agbanagkamin apaman a malpasko ti kontratak. Ngem dinadaelnakami, pinerdim dagiti plano ken arapaapmi... Sa ita, sa ita, Sadiri, sawem ti kasta? Karma, Sadiri, bad karma, patiemon nga agpayso!" Nagkatawa ni Cedrick. Manglalais a katawa. "Ket dakkel a pakaibabainan, kunam? Dakkel a riribuk?" intuloyna. "I don't care, Sadiri. Nangeddengakon, naisaganaakon ti amin. And I'm willing to take all the risks! Diak agang-angaw, Sadiri, I mean it!"

"For old times' sake, Cedrick," kinuna ni Sadiri a nakalablabbasit metten. Dandanidan maibus ti arak. "Ipakaasik, idawatko a bay-annakami la koman ken ni Joyce. Dakami ti agkagasat. Siak ti ay-ayatenna. Dinakan ay-ayaten."

Nagkatawa latta ni Cedrick, manutsutil. "Ngem ipakaasik met, idawatko met, for old times' sake, Sadiri, bay-annakami la koman ken ni Joyce! Dakami ti agkagasat! Siak ti ay-ayatenna! Dinakan ay-ayaten!"

Intangad ni Sadiri ti basona sana imbukbok ti natda nga arak.

"For old times' sake, Sadiri, agselebrarta ketdi. Bay-anta pay la dagita a bambanag. Dita koma ita pakarikutan." Timmakder ni Cedrick, tinurongna ti eskaparate dagiti nakadispley nga arak iti panel ket timmengnged iti maysa manen a Chivas Regal. "Ipabpabalaykon, Sadiri, just like the old times! Agselebrarta! Aginumta ketdi! Ket siak met ti mangespiar iti pulutanta!" Ket nagturongen iti komedor kalpasan a maluktanna ti innalana nga arak.

Nagulimek laengen ni Sadiri. Naamirisna nga awan matinongda iti saritaanda ken ni Cedrick. Maulawen, napuskolen ti rupana, natured koman a makidiskusion, ngem adda latta danag ni Sadiri. Buriboren ti nakemna: dina mapengdan ni Cedrick a mangipapilit a mangagaw ken ni Joyce!

(maituloyto)