Lussok
nga ungot
ni Gladys Menor

Umaykan, Apo Agrikultor, mangankan
Abunaw ti innapuy, dika madanagan
Kakaisuna nga adu't irik a naapit
Iti kinelleng a sangkabassit.
Manipud insurom moderno a panagtalon
Napuskolen nga aggipi mairaep a bunubon
Ken nasikenen ti dawa kadagiti luganian
Ta napigsat' kidag 'diay baro a ganagan
Napigpigsa ngem ti lugit ken takkit' nuang.

Awan met itan ti pagay nga agangkit
Manipud imbagam ti pestisido a maipugsit
Napaksiat aminen nagkaadu a sakit:
Awanen tungro, kutalo, ken rekket.

(Uray ni angol nga Angkuan inidiannan
Agipaarab iti nalangto a pinagayan
A talon dagiti kabaelanna a bugkawan
Ta nagburis ken nagkutkuttong ti nuang
A pinagarabna iti raep a napugsitan!)

Ngem, ne, sir, dayta asin, anusanyo
A pangsabor innapuy nga innak ipasango
Ta manipud naaramat ti abuno ken pestisidio
Awanen dalag a matiliw 'diay bubo
Awanen madusdusan a gurami ken ar-aro
Bisukol, birabid, ken leddeg, susapo
Pati ararawan ken alukap, diakon ammo.

Wen, awanen lames ken masida iti pinagayan
Ngem, ala, bay-amtayo daytan a pakariribukan
Ti nasken, sir, adu't innapuy dita dulang!