dayyeng 
ni apong 
ni bagnos cudiamat 

bugbugtong ti kawayan
ti gitara a duogan
simngay dallot ken dallang
agligsayen ti sangapirit a bulan

iti bulong dagiti kayo
rimkuas dagiti lua ken ay-ayo
tumanaktak a wasay ken martilio

uman-annayas ti kanta
ngem itan agmarmarapukawda
dagiti buok kasla sabong ti ledda

ladingitek ti panagpukaw
ti sellag ti bulan
sakbay panagbannawagna
la ketdi ti talna
adda kadata

umap-apros ti nalamuyot
nga angin iti kudilko
ket pinaluknengna
ti isipko a bimmato

agay-ayam ni noel iti yoyo
agpangato ken agpababa
ti nagtimbukel a kayo
ti sinulid dildilpatanna
tunggal kuti dagiti ramayna
kasta met ti biag, anakko