Maikadua a Paset

"NAGPINTASEN a buya!" nayesngaw ni Philip ket impalawlawna manen dagiti matana iti pakabuklan ti Kimmansir Falls. Pinaggilapna manen ti kamerana sa immasideg ken ni Rosebel a nakatugaw iti dalumpinas a bato a lalailuen dagiti kasla kristal a barekbek ti dissuor. Naginnisemda.

"Anian a nagdaeg daytoy a lugar, Rose,” kinuna ni Philip. “Kasla paraiso. Sika ni Eva, siak met ni Adan..."

"Adda kurangna, manong," kinuna ni Rosebel. "Ti mansanas..."

Nagrungiit ni Philip. "Adda kenka ti mansanas, Rose..."

Nagkuretret ti muging ni Rosebel. "Yanna koma?"

Nagkatawa ni Philip. "Siak met laeng ti mansanas, ti sulisog."

Kineddel ni Rosebel ti bakrang ti baro. "Boleroka a talaga. Adu unay ti ibagbagam."

Tiniliw ni Philip ti dakulap ni Rosebel. "Rose, ammom kadi no aniat´ nariknak idi damoka a makita?"

"Saan," kinuna ni Rosebel.

"Nagkintayegak idi..."

Nagpangato dagiti kiday ni Rosebel. "Ta apay met?"

"Gapu ta nakitakon ti babai nga ammok a mangparukma iti kired ken pigsak."

Nagkatawa ni Rosebel. Kineddekeddelna manen ti bakrang ni Philip.

Adda nagpukkaw. Ni Elvie, bitbitna ti balonda.

"Adda maangotko nga agat-lauya," kinuna ni Elvie idi makaasideg. "Adda la ketdi agpasurong iti altar iti mabiit no kaskasano."

"Alla, ni daytoyen, ti la masasaona," inkarawa ni Rosebel ti kuddotna iti bakrang ni Elvie.

"Ti agsidat´ sili, magasangan!" insurdo latta ni Elvie.

Nangaldawda.

"Adda man damagek, manong," kinuna ni Rosebel. "Pudno kadi a palikero dagiti mannurat?"

Immisem ni Philip iti bangbangir. "Diak masungbatan dayta," kinunana. "Ngem ti ketdi ammok, adu dagiti mannurat a maladaw nga agasawa."

"Ta apay met a kasta?"

"Wen, ta kaadduanna ngamin a mannurat ti awan makukuartana. Mabutengda amangan ta dida mabiag ti asawada!"

Nagdanggay u katawa dagiti dua a balasang.

"Ngem diak ibagbaga a kasta amin a mannurat, wen?" kinuna ni Philip. "Kinapudnona, adu met dagiti mannurat a masapa nga agasawa ta dida no kua maitarayan dagiti babbalasang a mangkamat kadakuada!"

"Kayatko met ti agbalin a mannurat," kinuna ni Rosebel. "Narigat kadi ti agsursuro nga agsurat!"

"Depende kenka," kinuna ni Philip. "No talaga a nareggetka, al-alistoka met la a makasursuro. Ngem ti maibagak, Rose, adu dagiti am-ammok a kas kenka a nagkalikagum met nga agbalin a mannurat ngem inlunodda ti kinamannuratda kalpasan a sinutil ida ni ayat.
No ngamin maysakan a mannurat, nangruna no addan naganmo, naruay dagiti mayat a makipagayam kenka. Ket posible nga agtinnag dayta iti naun-uneg a relasion. Ngem posible manen a marakrak dayta a relasion no ti karelasionmo ket daytay dina maaw-awatan ti tignay ken kagagalad ti maysa a mannurat. Amangan no ibagana nga adda sursurok wenno kurkurangmo no makitanaka nga agmulmulengleng wenno agtangadtangad, ket pagammuan lattan ta isinanaka. Ket no dimo maikalawa ti agpanunot, ilunodmo la ketdi ti kinamannuratmo ta isu dayta iti nakaigapuan ti pannakaam-ammom iti tao a nangpasakit kenka."

"Saan met ngata amin a lallaki ket kasta," kinuna ni Rosebel. "Ket tapno masiguradok a dinto mapasamak kaniak dayta, piliek, a, `tay mannurat met tapno agkinnaawatankami!"

"Husto `ta kunam, cousin," kinuna ni Elvie. "No kas ken ni Mang Philip, kas pagarigan, siguradok nga agkinnaawatankayto nga agnanayon."

"Korekka, Elvie," inyallawat ni Philip.

Bangbangir ti isem ni Rosebel a nangparimrim ken ni Philip.

Nagturongda iti Kimmappo Cave idi makapalpada. Kas met laeng iti Kimmansir Falls, nalitnaw ti danum iti unegna. Agbarekbek ti ubbog nga aggapu iti lansadna. Pagattengnged ti kaadalem ti danumna.

"Nakakaem kano idi daytoy, segun kadagiti lallakay ken babbaket," kinuna ni Elvie. "Ngem kalpasan ti naunday a panawen, in-inut a nagungap. Kinagiddan metten dayta ti panagpusuak ti danum iti unegna. Ket saanen a nagrikep agingga ita."

"Padasek man a pallailangan ti rukibna," kinuna ni Philip. Naguksob. Nagparang ti nabayog a barukongna ken dagiti maselan a luppona. Timmapuak. Nagmulagat idi addan iti uneg ti rukib. Inaprosanna dagiti rumimrimat a rutongrutongan a bato iti lansadna. Limmung-aw idi maangsan. Inisemanna dagiti dua a babbalasang a mangbuybuya kenkuana. "Nagpintas ti unegna!" kinunana.

"Kitaek man met!" kinuna ni Rosebel ket timpuak met daytoy. Sinurot ni Philip. Nakamakamna ti balasang iti katengngaan ti rukib. Tinukmaanna ti kanawan a palaypalay daytoy. Nagkayaw-at ni Rosebel. Nakaruk-at. Agkatkatawada idi makalung-awda.

Bimmatokda manen. Saan a nagpamayan ni Philip idi makalansaddan. Rinakepna ni Rosebel sana diningpil dagiti bibig daytoy. Naggulagol ti balasang. Rimmuk-at. Kamkamatenda ti angesda idi makalung-awda.

"Adda sirena iti uneg!" kinuna ni Rosebel a bulonna a timmakdang. Ginuyabanna ni Philip a kasta unay ti isemna.

Naatap ti ridep ken ni Rosebel iti dayta a rabii. Pampanunotenna ti napasamakda ken ni Philip. Damona ti maagkan. No kua ket mapaisem. Kasdiay gayam, kasdiay gayam, kunkunana iti nakemna. Addan panarsaritaanna. Pamrayanna latta ngaminen no kua ti agdengdengngeg no kasta nga agiinnestoria dagiti barkadana maipapan kadagiti ti nobioda.

"Makinobioka met ngaminen, Rose," kunkuna no kua ni Angie. "Nagadu la ngarud ti agar-arem kenka a pagpiliam. Nagganas ti adda bfna, wen!"

"Nakaragragsakak a kankanayon, sika," kuna met ni Jingjing. "Nalaing ngamin ni Laurence nga agpakatawa. Nakalalailo pay."

"Mas kannioso ni Charlie," idupag met ni Blezzy. "Kasla uken a kumarkarab-as no kua. Urayak la mapatpatunglab no kasta nga agbuyakami iti sine!"

Napaisem manen ni Rosebel. Saanton a makantiawan kadagiti barkadana. Ipannakkelnanto a maysa a nalatak a mannurat ti nakainnagekna.

Sumingsingisingen ti init idi makariing ni Rosebel. Nagbangonanna ti nagpakan iti manok. Kas iti dati, kamatkamaten manen ti manador dagiti pamusian. Umis-isem a mangbuybuya kadagitoy.

"Inka bassit labaan dagiti murengtayo, Rose," kinuna ni nanangna idi makapamigatda. "Inkan dita waig. Al-alisto. Ta la agibugsaw no kua. Alaem payen dagiti ules."

Kinayumkomna dagiti murengda. Nagturong iti waig. Idiay Kimmulluong, surongen ti waig, ti rantana a papanan. Napintas idiay ta adda dakkel a balite a paglinongan. Nadalus pay ta awan ti agpadpadigos sadiay iti ayup.

Sumalsalogen iti waig idi makangngeg iti kanabsuor. Nagsarimadeng. Adda la ketdi agdigdigos.

Indissona ti awitna a baniera sa nagin-inayad a simpok iti baet dagiti sunflower ken martial law a mangrugrugma iti wangawangan ti waig. Natengngelna ti angesna idi mabigbigna ti agdigdigos. Ni Philip! Naka-brief la daytoy. Agsagsagana manen nga agdayb.

Inalusiis ni Rosebel. Dina maikeddeng no pumanaw wenno saan iti pagsisiimanna. Naapputna dagiti matana idi agsabon ken agludlod ni Philip a nakatugaw itan iti ngarab ti waig. Nakaunnat dagiti barbonan ken maselan a sakana. Agdaldalluyon dagiti piskel ti takiag ken barukongna.

Timmallikud ni Rosebel idi agangay. Dina maawatan ti mariknana. Malaglagipna daydi panangagek ni Philip kenkuana iti rukib. Rimmuar iti pagsisiimanna. Intugawna iti abay ti indissona a baniera. Agsisimparat ti mapampanunotna.

Dina ammo no kasanot´ kapaut ti panagmulmulenglengna. Nakigtot idi maduktalanna nga
agtaktakderen ni Philip iti sikiganna. Nakapellesen daytoy.

"Inka kadi aglaba, Rose?" inamad ni Philip.

Nagtung-ed.

"Apay ngarud a dika dumanon?"

"K-Kua, manong..." nagkiremkirem. "Nakitak ngamin nga addaka dita..."

Immisem ni Philip. "Nabayagka kadin ditoy?"

Nagtung-ed.

Agkatkatawa ni Philip a nagtugaw iti abay ni Rosebel. "No kasta, nabuyam ngarud ti panagdigosko.

Saan a naguni ti balasang

"Dimo kadi nangngeg ti imbagak, Rose?"

Napadumog ni Rosebel. Dina ammo ti sawenna. Pagammuan, petpetpetanen ni Philip ti dakulapna.