rikna ti ubing  
ni herman g. tabin  

sinipsiputak ti pannakiginnubal
ni Dondon iti tulang nga itay pay
a ngutngutngutanna ta mailalaan
unay a mangibbet ngamin piman...
(iti ngina ti amin a magatgatang
manmano ngaminen a malanitan
ti subsob dagiti kakaanakak...
iti siled--mangmangngegko manen
ti dayamudom da manong ken manang
ammok a nauldotan manen ni ipag
ta nagdadaraddan dagiti immay
simmurnad iti paraangan a nakaukradan
dagiti atiddog a listaan ket naikari
manen dagiti naud-udan nga umay a lawas)
naibbatan ni Dondon ti kagubgubalna
ket amano a sinippaw ni Dogie
nga itay pay nga umar-araraw.
nagmuriot daytoy a mangagaw
agingga a nagkinnamatanda iti ruar.
nagbagsobagsol a nagsubli
sa nagkusaykusay iti sala
ket imbirakaknan ti nagugaog.
makarurodak a makaellek.
napawingiwingak...
kaanonto ngata a lumawa ti aangsan, Apo?