dagiti bituen  
iti barukong ti daga  
iti puuku mauka  
(kada Ric, Art, ken Andy)    
ni francisco t. ponce   

In-inut nga aggarakgak dagiti petales ti sardam
Iti pannakaitanggaya ti arak a nagkorona
Iti appupo dagiti rinibu a rimat iti adayo a deppaar
Kas bituen iti langit iti barukong ti daga!
Tunggal tangguap iti ingel bibineganna
Ti umun-uneg a talukatik ti rabii
Ket ti irut ken pateg ti panagkakadua
Agkitem, agrukbos tunggal garakgak ti maulaw a darikmat.
Ket ti langit iti kaunggan ad-adda a masubok
A mangsukdal iti mensahe dagiti madaniwan
Ken maukkoran iti prosa a silaw-bituen:
Ti panunot ken rikna iyalikuno ti daeg
Dagiti rimat a mangpurar kadagiti mata.
Wen, dagiti bituen iti barukong ti daga iti Puuku Mauka:
Bukraen ken iladawanda iti riwriw a pitik ti biag,
Italukatikna iti sabali a gloria iti barukong ti daga,
Mangep-ep iti limdo ni liday, iliw ken segga,
Napintas nga ayuyang ken imutektekan dagiti mayat
A mangsubok ti kinabanuar iti pluma,
Bituen iti langit iti barukong ti daga!
A, ngem dagiti bituen a maipasngay iti langit ti barukong
Awan ti makaartap iti rimat, sin-aw ken silnag
Uray pay dagiti bituen a naiburandis iti law-ang.