kararua
ti maysa a    
kinapudno        
ni john b. buhay

am-ammom dagitoy a natagari?
isuda dagiti bambamti iti kigaw
a timbukel, kas agtugtuglep
a drayber; pannagna

sukimatem daytoy a sappupo
manipud iti ikub daytoy
agbagtit a kanito nga anito
dagiti santo, agin-sasanto,
a nagluganan dagiti negatibo
a padto dagiti di makita
a kinapudno...

uray, siak, diak maawatan:
(ngem ammok): kapulapoltayo
dagiti managsao iti pudno
nga agur-uray iti sabali
a kararua ti nakem-isip
a mangyetnag iti dusa
dagiti napinget nga
aglinteg...

no adda pammaneknek
nga agmauyongakon, daytan
ti gundaway a maitan-okak
ket ringbawak amin
a pammadayaw: laisendak
iti kinadakesko tapno
mababalawak iti publiko,
inakok a dakesak, ket
diak naammuan nga adda
agur-uray a pammadayawko,
ket daytoy, awan nakakita
ken uray siak, diak
idi naammuan...

ibagak kenka, kabsat
agdakeska kadagitoy
a bambamti: kitaem
dagiti di makita tapno
makitam ti kinaisu ti
banag a makita, ngamin,
anniniwan dagita
dagiti kinapudno
a dumtengto...