ag-agkannak
ti ling-et iti pudot
ken adu nga anus
ni roy v aragon

ag-agkannak ti ling-et iti pudot ken adu nga anus,
il-ilutennak iti seggar ti magaggagaran a bulan,
diram-osam ti teltelko kadagiti babassit nga apros.

kumotannak iti arasaas ken adu a pannakaibus,
atagennak iti kabus, sapsapuannak iti linnaaw.
ag-agkannak ti ling-et iti pudot ken adu nga anus.

kibinennak iti bandus, dinak itulok a makabulos,
tiliwennak iti tunggal panagkaltaang ti sardam,
diram-osam ti teltelko kadagiti babassit nga apros.

igawidta man ti layap, puyotam ti lulonak iti rubrob.
dildilpatannak ti kannag, dinak biroken iti kasipngetan,
ag-agkannak ti ling-et iti pudot ken adu nga anus.

agaw-awisen dagiti bulong iti payapay nga agsusurot,
sagidennak iti adu a kaykaysa, adu a pannalakan,
diram-osam ti teltelko kadagiti babassit nga apros.

balkotenta ti parbangon iti adu a riing ken ungtob,
lallayanta ti turog iti agpatnag a kaipapanan.
ag-agkannak ti ling-et iti pudot ken adu nga anus,
diram-osam ti teltelko kadagiti babassit nga apros.