KIMMARO ti dagensen ni Joyce iti pangngeddeng ni Sadiri. Naapektaran ti trabahona ket dimmawat iti dua a lawas a bakasion iti opisinada. Kayatna ti aginana. Napanunotna pay ti agawid idiay probinsiada, iti lugarda kada Sadiri. Ngem inggawid ti amak: dina la ketdi malibasan ni Cedrick--sumurot la ketdi a sumurot daytoy. Kabuteng ni Joyce ti panagsasarakda a tallo kada Sadiri idiay probinsia. Aglalo no naammuanen dagiti dadakkel ken kakabagianda ti parikutda. Ken aglalo no imbagan ni Sadiri a mawaswas ti kallaysada. Dakkel la ketdi a riribuk ti maparnuay. Numona ta adda barbarrairong ti sumagmamano a kabagian ni Sadiri.

Ken maysa, saan a kadutdotan dagiti kakabsat a lallaki ni Joyce ni Cedrick idi agnobioda pay. Taga-kabangibang ngamin nga ili ni Cedrick ket kailian daytoy ti sumagmamano a lokoloko a kabusor ti adda met loklokona a kapurokan da Joyce ken Sadiri a pakaibilangan ti dadduma a kabagianda. Manmano idi a maisar-ong ni Cedrick iti purokda. Mabuteng nupay dida met ketdi kutien ta pagayam ngarud ni Sadiri. Idiay poblasion a naghaiskulanda, ken ditoy siudaden idi ti nangar-areman ni Cedrick ken ni Joyce. Uray idi agayan-ayatda, manmano a pumasiar ni Cedrick iti taeng da Joyce. Mabuteng latta ta agil-ilem ngamin ti sumagmamano a babbaro a nagkursonada iti balasang. Kasta met dagiti lallaki a kasinsin ni Sadiri a nangnamnama a ni Sadiri koma ti nanobio ni Joyce.

Isu a di makaikeddeng ni Joyce no agawid wenno saan. Uray panggepna a talaga ta tinawen met nga agawid kada Paskua. Sumagmamano la a lawasen ket Paskuan.

Isu a nakawaywaya manen ni Cedrick iti balasang. No mabalin, agyanen iti dagus ni Joyce. Aglalo idi maammuanna ti panangputed ni Sadiri ti relasionda ken Joyce. Di koma kayat ni Joyce nga ilatak ngem dina magawidan. Pinilit ni Cedrick nga ammuen ti gapu ti pannakaimaymayeng ti balasang. Ket ad-adda a nagbalin nga optimistiko ni Cedrick.

"No doubt now, data a talaga ti para iti maysa ken maysa, Joyce," impasingked ni Cedrick. "Data a talaga ket dimon panunoten ni Sadiri. Inawatnan a naabak, a napaay. Lipatemon. Awatem metten a data a talaga ti agkagasat. Winaswasnan ti panagkallaysayo. Data, Joyce, data ngarud ti agkallaysa! We've planned it then. It's the same now. As was, as is!"

Ngem awan marikna ni Joyce a talged wenno ragsak. Ta kasano a tagitalgeden ken tagiragsakenna a mapukawna ni Sadiri? Uray patienna nga adda pay la panagayatna ken ni Cedrick, nga itan siwawayawayan, dinto maakkal iti puso ken utekna ni Sadiri. Ta apay koma a saan ket ay-ayatenna met ni Sadiri. Lakana kadi a maiwaksi dayta nga ayat a nagramut ken nagramaram ken naibinggasen iti amin a rikna ken panunotna? Ay-ayatenna ni Cedrick, ala wen. Ngem ay-ayatenna met ni Sadiri. Duada? Ket ita, dina maako a dinan ay-ayaten ti maysa ket maysa laeng ti ayatenna? Maysa laeng? Ngem ayaunayen no asi-asi lattan a malipatanna ni Sadiri ken ti relasionda--dagiti arapaap ken planoda--ti kallaysada!

Lipatemon! Idardarirag ni Cedrick. Ket rumkuas iti isip ni Joyce: kasano a lipatenna ni Sadiri? Agdepende iti sungbat iti no kasano met a malipatanna ti namagbaet kadakuada ken ni Cedrick. No ita a mariknana a dina malipatan ket patienna nga ay-ayatenna ni Cedrick, ninto ketdin Sadiri? Maysa, ni la Sadiri ti nangeddeng--no pinalen daydiay a desision--nga awandan. Ket awan pay iti panunot ni Joyce kadagitoy a sarurongan wenno awaten dayta a pangngeddeng ni Sadiri--kaayan-ayatna pay la ni Sadiri.

Ket lumawlawag ken Joyce: unfair ni Cedrick a ma-ngikalkalikagum a dinan panunoten ni Sadiri. Selfish ni Cedrick. Wen, ta ti la bukodna ti pakaseknanna ket dina maawatan ni Sadiri, ti sasaaden daytoy. Ken wen, uray ni Joyce--saan a maawatan ni Cedrick ti situasion ni Joyce. Idinto a ni Sadiri, isuksukon daytoy ti karbenganna, agpabpabus-oy. Gapu ta ay-ayatenna ni Joyce. Gapu ta agay-ayat. Gapu ken ayat. Ket ma-guilty la ngarud a lallalo ni Joyce. Maay-ay la ngarud a lalo ken ni Sadiri. Ket wen, dumges la ngarud a lalo ti ayatna ken ni Sadiri...

Ngem no mangeddeng ket pilienna ni Sadiri, kasano a maadawyan ni Joyce ni Cedrick nga itan nakasiguradon nga isu ti mangikallaysa kenkuana? Ta no apay a di koma ngamin irupir met ni Sadiri ti ayatna ita? Apay a pilienna manen ti agsakripisio? Apay a dina ipilit kas iti panangipapilitna idi nga uray makuna a liniputanna ni Cedrick a nadekket a gayyemna?

Simmukon ni Sadiri. Sa pay immadayo. Ket adtoy, agmaymaysa, ania ti maaramidan ni Joyce iti maminpinsan a panangtagikua manen kenkuana ni Cedrick? Ni Cedrick a manen mangikarkari, agregget ken di agpabatubat. A saanen a maliklikan ni Joyce ta kadagitoy a kasla kawaw latta ti aminna, masarakanna a kamang ken talged ken liwliwa ti sidong ni Cedrick.

KADAGITI simmaruno nga aldaw, awan ti inaramid da Joyce ken ni Cedrick no di nagpallailang iti siudad. Pinindada dagiti sigud a gusgustoda idi a pappapanan. Restauran, parke, koliseum, department store, sinean, diskuan, night club, beach kdpy. Di samsamiren ni Cedrick ti agbusbos ket ammo ni Joyce a talaga nga insaganaan ni Cedrick daytoy a panagawidna.

Iti denna ni Cedrick a mangisubsubli kadagiti dati a senario ti ayan-ayatda, nayaw-awan ni Joyce dagiti dagensenna. Pinilitna nga inliwliwag. Surotsurot lattan ken ni Cedrick a patinayon met a kasla mangan-andingay kenkuana, mangyad-adayo a maminpinsan iti nakemna iti parikut, iti lagipna ken ni Sadiri.

Ket kadagiti pappapananda a putong ken bukodda a lugar, masansan a dina mapengdan ti pananglailo ti baro. Sumkad idi damo ni Joyce ta kasla makonsensia. Ngem dina madaeran ni Cedrick. Ken kasla awan gawayna nga agkedked ket dina masarkedan a mayagus met ti riknana iti pudot ni Cedrick. Ngem sipupuot pay laeng met, yamanen ni Joyce, ket makontrolna pay la ti bukodna a rikna ken ti rugso ni Cedrick. Agpatingga la iti natanang nga arakup ken nabannayat nga agek. Lumbes ni Cedrick ngem dina met ketdi piliten ni Joyce no agkedked daytoy.

Ngem agbaybayag, saanen a kontento ni Cedrick ket yaw-awisen daytoy ti papanda iti mas pribado a lugar.

"No ay-ayatennak--no talaga nga ay-ayatennak pay met laeng, paneknekam koma, Joyce," indawat ni Cedrick. "Kasla agduaduaak pay la ngamin. Ammok a laglagipem pay la ni Sadiri. Awan dakesna ti aramidenta. Long as you love me, long as I love you. Agayan-ayatta. Agin-innayatta. So what's wrong with it? It's but natural."

"Dayta kadin ti ammom a pangrukodan iti kinapudno ti panagayat?" kinuna ni Joyce. "Adu ti sabali ken umno a wagas a pangipaneknek, Cedrick. Maawatannak koma. Diak maaramid ti kayatmo agingga a diak maikallaysa. Ammom ti prinsipiok."

"Okey, it's alright," kinuna met la ni Cedrick. "Dika piliten. And I'm very sorry. Maawatannak met koma. Ay-ayatenka la ngamin ket diak kayat a mapukawka pay. I just wanted to be sure you're just mine alone."

Maawatan met ketdi ni Joyce ta ipapan ngaminen a talaga ni Cedrick a naallukoynan a naminpinsan ni Joyce ket agnobioda manen ket isudan ti agkallaysa. Isu a kasla hustipikaren ni Cedrick dagiti sexual advancesna. Mapnek ni Joyce nga ay-ayaten ni Cedrick. Ket mabalin a paset itan ti ayat ti baro a kinaromantikona--a narugso ken passionate itan ti ayatna a nalabit ginubuay ti nabayag a panagsinada. Daytoy ti mapampanunot ni Joyce.

Ngem maikawa ni Joyce iti kinaagresibo ni Cedrick ita ta saan a sigud a kasta ti baro kenkuana. Nagayan-ayatda iti nabayag a panawen ngem saan a tinulawan ni Cedrick ti kinababaina. Paset ti tinnulag ken kinnarida a dida mulitan ti ayan-ayatda iti awan kaeskanna a premarital sex. Maysa a nangayatanna unay idi ken ni Cedrick ta nagtalinaed daytoy a napudno ken natakneng kenkuana. Maitured ni Cedrick nga angawen ti sabali a babai ngem respetarenna unay ni Joyce ket dina pulos ginandatan ti balasang iti maikaniwas iti prinsipio daytoy. Adda met lokloko idi ni Cedrick ket nalimed a nagarem-arem ken nainaig met iti sumagmamano a babai idi agad-adalda iti kolehio. Nagang-angawan la idi ni Cedrick dagitoy ket nagpudno ken nagpakawan met la ken ni Joyce.

sumaruno a pahina