|
Lucky you live
Hawaii
ni Fernando A. Agnes
ITI NAMINSAN nga idadar-aymi iti maysa a pasken ditoy Isla ti Oahu, Hawaii, a pagnaedanmi, nakapatpatangmi ti dua kadagiti nasinged a kabaddungalan ken kapatadami: da Julio ken Victor. Nabayag met bassiten a dikam nagkikita ket magagaran ti tunggal maysa a mangammo iti agdama a sasaaden ti maysa ken maysa kadakami.
Gapu ta medio napigsa ti anabaab iti lawlawmi, nagpaknikami iti maysa a suli tapno maimdenganmi ti sawen ti tunggal maysa ken tapno maipasnekmi ti agsasarita. Napagsasaritaanmi ti agdama a kasasaad ti panagbiag iti Hawaii.
"Kunayo ket makapanpanawannakon ditoy Hawaii," kinuna ni Julio. "Nangina met aminen a di mangan-ano. Pati bills narigaten a mabayadan!"
"Agpayso ta kunam, gayyem," insippaw ni Victor. "Ngem saan koma a dagiti negatibo a pagkapsutan ti Hawaii ti panunotem no di ket dagiti positibo a paspasamaken ti Hawaii. Agyamanka ketdi, datayo amin ditoy, ta agnaedtayo iti Hawaii. `Tay kunada ditoyen a 'Lucky You Live Hawaii'!"
Agpayso ti nakuna dagiti dua a gayyemko. Pudno a narigaten ti sasaaden ti Hawaii. Ngem kas nakuna ni Victor, dagiti koma positibo a paspasamaken ti Hawaii ti kitaen a di ket dagiti negatibo nga aspeto ti panagbiag.
No idilig ti Hawaii kadagiti dadduma a paset ti lubong, adayo a nasaysayaat pay laeng ti sasaaden ti Hawaii. Pagarigan ti standard of living, saan met pay nga isu ti nangato unay. Kitaentayo ti pagilian a Japon nga isu ti maikadua a kadakkelan ti ekonomia ditoy lubong (sumaruno iti Estados Unidos ti America). Aganil-il pay dagiti Hapones iti kinarigat ita ti ekonomiada.
Adu ti makagapu no apay a kasla naidumduma ti kinangato ti presio dagiti magatgatang ditoy Hawaii. Umuna unay, kasla naipuritak iti katenggaan ti taaw. Lima nga oras a tayaben ti eroplano ti manipud iti mainland U.S.A. Mainugot leng a panunoten a nanginngina dagiti tagilako ditoy ta adayo ti nakapartuatanda. Ngamin ta ti Hawaii awan makuna a pagpartuatanna. Daydi kakaisuna a parpartuanenna nga asukar ket nagsardeng metten. Nagrikep aminen a plantasion ti unas nga isu ti paggapuan ti asukar. Ti laeng makuna ita nga industria ti Hawaii isu ti turismo.
Agpayso nga umirut ti kasasaad ti panagbiag ngem adu met ti mabalin a pangalapkapan iti pagbiag. Adu ti dua ti trabahona. Adda pay tallo no tumawarka, kas pagsasao.
Nasagidtayo ti maipapan iti turismo. Tapno saanka a madukotan unay nga agpanunot iti kasasaad ti panagbiag, masapul nga agaliwaksayka met iti sagpaminsan. Laglagipem nga adu a tao iti lubong ti mangar-arapaap a mapasiarda koma met ti Hawaii. Ket adu ti mangikarkarigatan iti panagbakasionda ditoy Hawaii. Adu ngamin dagiti makaay-ayo a lugar ditoy. Adu dagiti makaliwliwa a buya. Kangrunaanna unay ti agdindinamag a kinapintas ti klimana. Saan unay a nalamiis iti winter ken saan met unay a napudot iti kalgaw. Kalalainganna la unay. Ti nalinak a baybay, nangnangruna dagiti makaay-ayo ken napupudaw nga aplayana kas iti nalatak iti sangalubongan a Waikiki Beach, Sunset Beach, Ala Moana Beach, Ewa Beach ken dadduma pay. Dagiti nadalus ken napariir a parke. Amin dagitoy makapabang-ar a pagliwliwaan. Nalames pay ti baybay. Adu ti makalapan no adda anus.
Saan la a dagiti saan nga agnaed iti Hawaii ti rumbeng a mangsagrap kadagiti makaay-ayo a buya ken pagpalpaliwaan iti Hawaii. Dagiti agnaed ditoy masapul nga agturistada iti bukodda a lugar. Ti ngamin adatna no dadduma ket kasla ditay ikankano dagiti banag a di pagkuartaan. No inka pumasiar wenno umaliwaksay kunam kasla awan kaes-eskanna dayta a banag. Kasla agdaddadaelka laeng iti panawen. Ngem biddut daytoy a panangipapan. Masapul met ti bagi ti panagaliwaksay wenno relaxation a makuna. Masapul ti panagaliwaksay tapno maiwaksi dagiti babantot ket maiwagat dagiti negatibo a pampanunot. Iti kasta makariknaka iti bang-ar ket lumag-an ti bagi ken panunot.
Iti baet dagiti agsasamusam a rigat a pasaren ti inaldaw a panagbiag ditoy Hawaii, makuna nga am-amang a nagasgasat pay laeng dagiti agnaed ditoy ngem dagiti adda iti sabali a paset ti lubong. Natalged ti kasasaad ditoy la ketdi no agsalukagka.
|
