Agingga a di napupuotan ni Joyce, at-atibayenen ni Cedrick ket agturongdan iti kuarto daytoy. Awan pigsa wenno nakem ni Joyce a maapirasna tapno agkedked, kawaw ti panunotna a lalo a binibineg ti nainumna.

Apaman a nakaunegda iti siled ken mai-lock ni Cedrick ti ridaw, rinakep ken inagkan a dagus ti baro ni Joyce. Itay pay agsalsalada a lalailuen ni Cedrick ket na-arouse metten ni Joyce ket sibabara a nangsubad iti rugso ni Cedrick.

Simrek ni Cedrick iti banio idi agangay ket nabati ni Joyce a kasla mataltalimpungaw. Awan umno a maisipna ta agsisimparat ti mapampanunotna a degdegan ti pannakaul-ulawna. Yepyepen iti nakapsut ken naumbi a musika iti linuktan itay ni Cedrick nga stereo ken iti nasayamusom a salemsem ti aircon ket kayatna a yidda. Ngem namrayanna ti nagtugaw iti iking ti nalukneng a kama ket minulenglenganna ti pakabuklan ti kuarto. Liniklikanna a mingmingan dagiti naipalawlaw a dadakkel a sarming ta kasla mabain a makakita iti repleksionna kadagitoy.

Rimmuar ni Cedrick iti banio. Nakabidang laengen daytoy iti tualia. "O, dika kadi ag-shower?" sinaludsodna iti awan kutkutina a balasang. "Ease your mind. Try the hot and cold shower. Iti hot nga umuna sakanto bigla nga ag-cold--pasalibukagen ken pakirdenna ti rikna!"

Awan lattat' simek ni Joyce. Sidudumog. Dina kayat a makita dagiti repleksion iti sarming iti aglawlaw.

"Make up your mind, Joyce. Awan dakesna daytoy. We love each other, this is just right and a must." Immabay ni Cedrick iti balasang ket rinugianna a lailuen daytoy. Inag-agkanna ti buok, ti muging, ti lengnges, ti pingping, ti lapayag, ti agong, ti bibig ni Joyce. Sibabannayat, silalag-an, napnuan arte. Agingga nga inawidna nga impaidda ti balasang iti kama.

Iti panagdisso ti bukot ni Joyce iti kama, iti pannakataldiapna iti langada iti kama ken Cedrick iti sar-ming iti bobeda, kasla namurmurayan ket immakkal ti balasang ken ni Cedrick. Bimmangon. Nagtugaw iti iking ti kama, tinallikudanna ni Cedrick. "Diak kaya, Cedrick... Di maiparbeng daytoy. I'll go now, please..."

"Joyce, maiparbeng laeng daytoy," kinuna ni Cedrick a bimmangon ken nangtengngel kadagiti ngem napnuan sin-aw ken sudi ken tan-ok ni ayat. Darang a namagtugmok ken namagsilpo ken namagraip iti amin a rikna ken nakem ken puotyo a nagbulig iti dayta a mangnibinibi a pannakapnek, wayawaya ken talinaay...

Ket sinarapa ti kadaratan dagiti bagiyo...

Joyce...

Sadiri...

I love you...

I love you...

Oh, Joyce...

Oh, Sadiri...

Ngem sakbay a makalipatkayo a maminpinsan, immibbet kenka, bimmangon ket kinunana a kasla agbabawi: I'm sorry, di maiparbeng daytoy... Ket dimmawat iti pammakawan. It's alright, kinunam met lattan ket iti panagpulang ti naan-anay a nakemmo, kaska la sibabasol, sibabain. Ngem ketdi nalawag kenka: dimo tagidaksen ti napagteng ket no naan-anay man koma a nayaguskayo iti apres dagiti riknayo, dimo koma nagbabawyan ta intulokmo, pinatuboyam a mapasamak iti nagan ti ayat. Ta ay-ayatem unay ket ay-ayatennaka unay iti ayat a napudno, nadarisay, natakneng, agnanayon.... Ket itoy a dina panangtutop wenno pananggundaway kenka, ad-adda a napaneknekam ti kinasin-aw ti ayatna. Awanan panagimbubukod nga ayat. Ayat a ma-ngipangruna, mangidaduma. Ayat a sagrado... Ket i-nakupnaka ti ad-adda a ragsak a nangitayok kenka iti kangatuan a pannakapnek iti kaaddana a mangay-ayat ken agay-ayat kenka ken iti kaaddam nga ay-ayatenna. Manen ken manen, nariknam ti kinasudi ken kinapateg ken kinalitnaw ti dayaw ken kinataom a dinanto mulitan no di ket ikanawa ken salimetmetanna a patinayon......

"Joyce... Joyce..." inyarasaas ni Cedrick iti pana-ngituloyna a manglailo iti balasang; nabannayat, in-inut a ritual a pangikulbona a maminpinsan iti rikna ken nakem ni Joyce. Inkidem ni Joyce iti nairut; awan iti agdama a panunotna, nakatalimudok iti napalabas, iti lagip: iti daydi a pagtengda ken ni Sadiri; ket itan, sumken, sumigab kenkuana ti kita wenno wagas ti panagayat ni Sadiri: napudno, nasin-aw, managpabus-oy, natakneng...

"I love you, Joyce... I love you..." sumgeden ni Cedrick; inagkanna manen a sirurugso ken sigagartem ni Joyce a sikikidem latta, nairut; itan, ut-utobenna ti klase ti ayat ni Sadiri, ti ayat ni Cedrick. Ah, iti ayat ni Cedrick, di marikna ni Joyce ti maipangruna wenno maidaduma wenno mayalikaka kas iti ayat ni Sadiri. Ah, maikursong ken madadael ken magundawayan, dayta ti mariknana itan iti ayat ni Cedrick...!

"Joyce, I love you..." Rimmakab ni Cedrick iti balasang. Nagareng-ang ni Joyce idi agsawar ti agek ni Cedrick. Ay-ayaten ni Cedrick. Ngem masierton ni Joyce: saanen a kas idi, ket itan: ayat a managimbubukod, nasabrak, naturay...

"Joyce... Joyce... I love you... I love you..."

Saan! Saan! Nagbalaw ni Joyce. Nabukelna ti nakemna ket immakkal ken ni Cedrick, induronna ti baro. Kasla nabuyatan iti nalamiis a danum ti derrep ni Cedrick, naikuleng a nangkita ken ni Joyce a nanglinged ken nangurnos iti bagina.

"D-Diak kaya a talaga, Cedrick... Pangngaasim... diak maaramid... Diak maaramid..."

Umanges-anges ni Cedrick a nangmulengleng iti balasang.

"Please take me home, Cedrick... Please..."

"Why, Joyce? Don't you really love me?"

Di nagtimek ni Joyce. Nakadumog, dina kayat a kitaen ni Cedrick wenno makita ti repleksionda kadagiti sarming.

"Tell me, Joyce, dinak kadi a talagan ay-ayaten?" inawid ni Cedrick ti abaga ti balasang ket sinangona, inyangadna ti rupa daytoy. Awanan turong dagiti mata ni Joyce.

Awan nauray ni Cedrick a sungbat. Ket rinugianna manen a lailuen ni Joyce. Ngem nagtalinaed nga awan simek ken kutina ti balasang. Ket idi kuan, nagarubos ti luana.

Nagsardeng ni Cedrick idi makitana dagiti umaribasay a lua ni Joyce. Inibbatanna ti balasang ket mangmesmesmes a timmakder a timmalikud.

"Alright, alright, I'll take you home, Joyce," kinuna ni Cedrick idi agangay ket nagpellesen daytoy.

Awan tagarida idi addadan iti taxicab nga inayaban ni Cedrick. Adayo ti turong dagiti mata ni Joyce. Pasaray mangmesmes ni Cedrick, nakair-irteng ti rupana.

Saan a nagbayag ni Cedrick idi maitulodna ti balasang iti apartment daytoy. Pinaguray ti baro ti taxicab nga isu met la ti lugananna nga agsubli iti hotel.

Sakbay a pimmanaw, kinuna ni Cedrick: "Maawatak ti panagkedkedmo. Ammok, agduaduaka a talaga kaniak. Ay-ayatennak, wen, ngem agduaduaka iti talaga nga intensionko. Ket tapno mapnekka a napudnoak ken seriosoak a mangibanag kenka, nasken nga agkallaysatan! Addan nakatulagko a hues--inton bigat met laeng, agkallaysata, Joyce! Prepare yourself, sukonenka a masapa!"

(maigibusto)