I.

Innakon patgan ti awis -
   Warsiannak ngarud iti kararag
   a silaw ti pakinakem
   sarukod ti pakinakem,
   a kumaramut kadagiti ngipen,
   garakgak dagiti napasidumri
   a bibig, dagiti nalag-an timidna
   nga ari iti kahita - a pagarianda?

Ala, wen, agsusuonak iti diken -
   Anusak dagiti ikkis,
   salugsog dagiti makamermer
   nga angin dagiti kullayaw
   para iti ugis nga inyugedko
   a surotek agingga iti ngudo
   pagpatinggaan ti unnoy-tured
   agingga a saramsamek
   bunga ti agkusaykusay a namnama...

Ngem `paunayen ta -
   Balangkantis ti libro't biag!
     nakaimalditan dagiti naslep,
     marayray-ab a pinanid
     dagiti napirpir-at a kari
     nga abalbalayen ti sutil, ken
     nagkuribateg a namnama.

II.

Naapgaden dagiti ayug…
  kawawen dagiti lente
  ti bulsek nga arapaap
  dalluyon dagiti umel a talukatik
  orasan iti poste nga agpagpaggaak
  iti kabakiran ti siudad!

Ha, ha, ha... Siak?
Sawsawir ti lawag?

  Usarekon daradara a lapis,
  Ta ugedakon pagpatinggaak!
     ta dakayo ti makapuling,
     karsel ti konsensia
     iti naangdod a plasa
     nga intanem dagiti linnaaw
     iti riduma a katapokan
     a paypay-udan dagiti iriag,
     dagiti balangkantis a payapay.

Kastan, yamanem pay -
  Ta ingatok dagiti imak
  nga agpakada kenka:
  (nailubnak, nailungon)
  makasabidong a bunga!
  Ta dikanto masukdal
  iti inka panagkarkaradap
  iti pitak nga arubayan
  ti sipnget a di masilawan...

III.

Adtoyakon -
    Agtagtaguob a bingkol
    iti ngarab dagiti tadem ti rengngat,
    ti makapleng a panagwaywayas
    iti ginget dagiti rippiis
    a mangsulek iti kinaulimek,
    a pinanawak-pagpatinggak,
    ta awan pagpiliak
    masnop a pagaponak.

     ...ditoyen ti pangabalbalayak
     iti kinaasinok a nanaganan
     iti siak: ta ti kunak idi: saan a siak
     ngem kunakon ita: a siak
     ket saan a mannalon iti siudad!