Testamento
ti ulila a kari
ni Aurelio S. Agcaoili

1.
Agaribungbong no kuan dagiti legleg
No dumteng ti arbis iti daniw nga in-inawek
Kas Ita. Daytay daniw iti lagip dagiti bengkag

A kumamang iti silpo ti arapaap
Dagiti sarusar a masikog. Malunag no kua ti rikna
Ni Tata Ubing ket agatang kadagiti minatay

A mabisin. Agpatedted iti daran' darisayen
Ni Nana Ubing kas sungbat kadagiti signos
Ti mabisbisinen a langit.

Ngem nakitam kadin, kabagis, dagiti kuton,
Dagiti nalabbaga a gasat iti dulang,
Dagitay mannubbot iti gawat

Iti rekkang dagiti sugat ti sakot' pagay
A di latta mabedbedan, nakabarday
Iti alad dagiti pangrabii a nakeltay?

Di kadi ta kinumawda metten ti pammigat
A maidasar koma ken ni Lung-aw,
Ti dios dagiti dios dagiti magapas

Koman a pagay, pamedped iti bisin,

Pangallilaw iti allilaw met laeng
Ti mensahe ti kamara dagiti bulbullagaw,

Dagitay amarilio a tao,
Binussog met laeng ti amarilio a pangngaldaw?
Di kadi ta iti panangibaut kadagiti ginapas,

Dagitay binunton a kari dagiti darikmat,
Agdara latta ti kumpay, agbugsot latta
Dagiti kinelleng, agpiesta latta dagiti billit-tuleng,

Itayabda dagiti espiritu ti nabuslon nga ani,
Idatonda dagitoy kadagiti altar a puraw
A dios, residente iti templo ti puraw a kaasi.

2.
Miraek no kua dagiti legleg
Iti panangaribungbongda iti silaw ti adalem
Itan a rabii, testamento ti ulila a kari.