Burnay | Tomo 2 / Bilang 7 / 1999 | Daniw | Iti Panaglabas Dagiti Dalipato Iti Lulonan Ti Biag

iti panaglabas
dagiti dalipato
iti lulonan ti biag
ni jacinto b. de peralta

Nupay naikay kenka dagiti gundaway
Iti panangbirokmo iti naikari
A kaimudingam ditoy lubong a napno
Iti pannubok a naikalang: Tapayaem
Latta ti kinapudno, ta narigat a
Maiwagat dagiti ngatangata
Iti panangbilangmo kadagiti bituen
Iti panagdaliasatmo iti let-ang
Dagiti darepdep, ta nalibeg dagiti
Ubbog iti law-ang ket awan iti biag
Dagiti simbolo ken metapora
A mangiladawan kadagiti sangarakem
A kalikagum a naidulin iti
Namayengmeng a sagumbi ni gasat.

Ngem ammom nga iti panaglabas
Dagiti dalipato iti lulonan ti biag
Adda dagiti pangngarig a di maibugasan
Iti kaipapanan dagiti di mapukaw
Nga aleng-aleng
Iti pangsiglosiglotmo kadagiti barakus
Iti bakrang panagkayaw-at iti kasipngetan,
Ngem adda regta dagiti darikmat
Nga umisem iti ikakarab-as
Iti barukong bantay pannakigasanggasat
Ket umanangsab dagiti pawikan iti baybay
A nakilumba kadagiti allon panawen,
Tapno mamarisan pay pingping ti langit
Iti nadumaduma
A maris-bullalayaw-namnama,
Ket maimuntar kadagiti linnaaw iti dakulap
A mamagdam-eg natikagan a kaikariam
Iti appupo ti agkankanta a karayan.

Iti alimpatok kapan-awan a turod
Adda dagiti maibislin nga arapaap
Iti panaglunglung-ay dagiti pan-aw
A mangikayabkayab iti kinaimnas
Talingenngen-nakaparsuaan, tapno
Adda met la talinaay dagiti gundaway
A mangipayapay kadagiti tumatayab
Iti kaibatogam iti sidong nangato
A torre a pagwanawanan bareng no
Matannawagan pay naikari a pagbalinam
Kalpasan iti pannakaidaramudommo
Iti daga dagiti mapannubok a gasat.

Ngem naimnas latta a denggen irair
Kutibeng ket ammom iti tunggal
Samiweng a maidayyeng, adda annayas
Ti kaipapanam a maibugas kadagiti ritmo
Iti agduduma nga aweng ket ti talibagok
Dagiti liriko a naibinggas danggayanda
A mangpabileg namnbamamam iti isasangbay
Napudpudno nga anag ti biag
A mangparegtat' sibubukel a kinataom.

Adayo pay ti dua a ribu a tawen
Ngem rugiam itan nga ablen kaipapanam
ta barbareng iti idadateng dayta a
Tawen, narayrayto dagiti bituen
A mangiburay kenka iti narayray a
Silawmo iti dalan nga agturong iti
Alimpatok iti panagballigim,
Ngem agkutika itan tapno magun-odmo
Dagiti kalkalikagumam a panagbaliw
Iti panagbiagmo iti masakbayan
Sika ken dagiti parparmatam
Iti dua a ribu a tawen
Kabuyogmonto iti panagdur-asmo.

tomo 2/bilang 7
1999

s a l a y s a y
Daniw
Ken Sinan-Daniw
Roy V. Aragon

s a r i t a
Murkat
Roy V. Aragon

d a n i w
Burburtia
A Pangngarig
Johmar R. Alvarez

Balangat A Kari
Reynaldo V. Idica

Dayyeng
Ni Apong
Bagnos Cudiamat

Umaddangak
Eduard Britos

Dagiti Bougainvillea
Iti Villa Margarita
Lawrence D. Martin

Iti Panaglabas
Dagiti Dalipato
Iti Lulonan Ti Biag
Jacinto de Peralta

Allawig
Ti Inosente A Puso
Lorenzo Ilustre

n o b e l a
Sika A Prinsesa
Dagiti Rosas (5)
Pete B. Duldulao

g a l e r i a
Sirmata 2:
Digital
A Manipulasion
RV Aragon

f i l i p i n o
When Life
Seems Endless
Lorna Salvosa Agpay

Bisperas ng Pasko
Gomer V. Aragon

Tatsulok
Na Pag-ibig
Lorna Salvosa Agpay

Isang Manunulat:
Narito, Alamin Mo:
Isang Alipin,
Cielo L.
Rio Noviembre

Masakit
Ang Tiyan Ko
RV Aragon