ibuyogmi ti eppes  
a bulibol ti daniw  
ni daniel l. nisperos  

burakek latta no kua ti ulimek dagiti bingkol
nga inkuduag ti sarapa ket sinaratsat palang
sarunuenta ti al-al ni sawak iti murdong ti witiwit
ta adda kari tunggal gamal ti iteppelta a bunubon
iti tunggal limbang ken takap
adda ti di matay a karit iti ungto ti tambak
a pangitungpalan iti rugi ken gibus ti bisin
adda latta sirnaat ti kuyem ti sangaapuyan
a katimbeng ti agmalem a saraaw ti dalikan
ken rungaab ti ugaw a pagbagasan
adda latta kussuoy ti nakem tunggal dumteng
dagiti kimat-dulluog ket makitagnawa dagiti arado
ken suyod a makigubal latta kadagiti saplit
dagiti piskel nga inaradas ti utang
dagiti kaldero nga inlunod ti kuton
dagiti dawa nga intayab ti manok
ken inyanud ti rugso ti arak iti entablado
ti lamolamo ken mannala latta a bisin
ket sapulenmi latta no kua sapulenmi
dagiti eksodo ti daradara a darudar
ken panagsubli dagiti riniadan a dapan
ken kapuyo ti kinersang a dakulap
ta ibuyogmi ti eppes a bulibol ti daniw
ay agsala latta dagiti arep-ep ti lung-ay ti angin