|
no
d u a d u a e m
pay
nobela ni
roy v. aragon
maika-6 a paset, pahina 2
Nobiembre 26. ....Awanen ni Sadiri. Ket nakawaywayan ni Cedrick. Inaldaw a sumarungkar. Iti opisina. Pangan iti ruar. Pasiar. Shopping. Disko. Diak makapagkedked. Diak maliklikan. In a way, I enjoyed being with him. Diak magawidan ti bagik. Talaga a napateg pay la kaniak ti napalabas. Cedrick's bringing all them today. Diak maiwasan ti di matignay. Uray pay ngata ammok nga ar-aramiden ni Cedrick dagitoy tapno magutugotak. And afraid I'm going to submit. Diak madaeran ti pamuspusanna. He's trapping my feelings. Ta diak maawatanen ti riknak. Paayatennak a paayaten. Ket kasla kayatko ti matnag. Kayatko a saan. Ta pampanunotek met ni Sadiri. Ammok ti rason no apay a nasapa a nagbakasion. Ngem awan ti ammok a maaramidak ita no di ti mangay-ay kenkuana. And to feel guilt. Wen. Lalo ita ta diak maliklikan ni Cedrick. A diak magawidan ti riknak a makisimpatia iti napalabas. Nga ita isubsubli ni Cedrick. Ket amkek: adda pammatik nga adda pay la panagayatko ken ni Cedrick. Kayatko a patien a kasta. Ta apay a kaykayatko manen ti maidenna ken ni Cedrick? Ta apay a mapalubosak a mapasamak amin dagitoy? Ta apay a diak kabaelan nga iwaksi ni Cedrick? Simple met la koma a talaga no kayatko. Kas kunkuna pay ni Elaine, kunak la koma: "Sardengannakon. Dikan ay-ayaten. Ni Sadiri ti ay-ayatek." Ngem apay a diak kaya? Wenno mabutengak la ngata a talaga? Ah, ngem no kayak man, dinto met la patien ken awaten ngamin ni Cedrick... Wenno ay-ayatek pay la a talaga ni Cedrick? Ngem diak met kabaelan nga iwaksi ni Sadiri. A patiek nga ay-ayatek latta. A diak ipalubos, ti kunak, a waswasen ti tulag ti kallaysami. Ay-ayatek. Wen. Ket diak kayat a patien nga obligasion la daytoy. Ngem kasano a paneknekak? Kasano a mapamatik ni Sadiri no mariknak ita nga ay-ayatek pay met la ni Cedrick? Diosko, mabalin kadi ti kastoy? Ay-ayatek ida a dua? Ket diak ammo ti piliek? Ngem nasken kadi nga agpiliak? No diak kayat a paayen ti maysa kadakuada? Maysa laeng. Mangeddengak. Asino? Asino?
Nobiembre 27. Immay ni Elaine ditoy dagus. Am glad. Nabayagen a di simmarungkar uray idiay office. Wenno tumawtawag la koma. Siak ti agkaratawag. Telling her my problems. My doubts. My fears. Sangkakunana met: liklikamon ni Cedrick. Ammok: adda kasla gura kaniak ni Elaine. Ni ngamin Sadiri a talaga ti kayatna para kaniak. Sangkapalagipna nga aginnayoskamin ken ni Sadiri.... Ket ita a naisar-ong, sinalangadnak ni Elaine. Imparupana ti sakit ti nakemna kaniak iti pannakikuyogko ken ni Cedrick. Unfair kano ken ni Sadiri. Ni Sadiri nga isu ti nobiok a pakikallaysaakon iti mabiit. Agpanunotak kano koma. Bay-akon ni Cedrick. Awanen karbenganna ni Cedrick. Kinunana pay: "Masdaawak, apay a pakarigatam, pakarikutam la unay a maliklikan ni Cedrick. No apay a kasla narigat la unay a maawatam ni Sadiri. Dimo kadin ay-ayaten? Siasino kadi ti ay-ayatem?" Binay-ak ni Elaine nga agsao. Diak ammo ti isungbatko. Gayyemko. Maawatak. Adda karbenganna a sungatennak. A bagbagaannak. Kayatnak a riingen. A tulongan. Sairennak tapno ammuenna ti reaksionko. Ngem ania ti maaramidak? Diak maliklikan ni Cedrick. Agpilit. Agikalintegan. Agipangta. Ket addaak la a lalo a mariribuk. A mabuteng. Ammo ni Elaine daytoy. Ngem kinunana: "Adda kadi karbengan ni Cedrick no dimo patgan? Apay nga agpilit no dimo patuboyan? Adda kenka, Joyce, adda kenka!" Nalabit husto ni Elaine. Wen. Ket nalabit ad-adda a kaguranakon no maammuanna a matmatnag manen ti riknak ken ni Cedrick. Diak pay inlatak daytoy a banag ken ni Elaine. Diak maibaga. Kabainko. Kabutengko. Ngem ti ammok, madlaw ni Elaine. Kabisadonak. Masiroknak ni Elaine... Ket binagbagaannak latta. Impalpalagipna ti planadon a kasarmi ken ni Sadiri. Konkonsensiaennak. Dimdimngegak lattan... Idi agpakadan ni Elaine, sana la imbaga ti talaga a gagarana: adda intedna a seliado a cassette tape. Voice tape kano ni Sadiri. Impaunay-unay kano ni Sadiri nga ited ni Elaine kaniak no makapanawen. Ngem di inted a dagus ni Elaine. Ammo kano ni Elaine ti inagapad ni Sadiri iti tape ta impalgak met la ni Sadiri kenkuana. Ket di kano kayat ni Elaine a mapasamak ti imbaga ni Sadiri iti tape. Isu nga inrantana nga intantan nga ited. Dina kano koma ketdi payen ited. Ngem inted latta ni Elaine. Ta nakitana a kasla mayas-asidegak manen ken ni Cedrick. Bareng kano no matignayak no mangngegak ket makapanunotakon iti umno. Nagkebbakebbaak. What's in the tape? Im-playk a dagus idi awanen ni Elaine. And was so shocked. Diak namnamaen a kastan ti napanunot ni Sadiri. Poor Sadiri. Nagsangitak. Linadingitko unay ti inkeddeng ni Sadiri. Nagsangsangitak a nagsangsangit. Dinak pinaturog ti voice tape ni Sadiri. Inulit-ulitko a dinengdengngeg. Aglalo ti kanta a kakuyog na... Poor Sadiri....
***
VOICE TAPE NI SADIRI KEN NI JOYCE (nairekord idi Nobiembre 21, 19___):
KENKA, Joyce.... Diak mayebkas daytoy iti sangonsango isu nga irekordko laengen. Actually, insuratko daytoy. Tapno nawaya ken sibubukel a maibuksilak. Ket ibasak laengen... Sawek dagitoy nupay diak koma kayat nga uray panunoten laeng. Ngem nautobko a nasken... No dika pay makaikeddeng, wenno no dika a talaga makaikeddengen--pakawanennak itoy a pagarupko--siakon ti mangeddeng, Joyce. Diak ammo no maiparbeng daytoy. Ket diak ammo no kasanom a maawat. Diak ammo no talaga a desperadoakon wenno maminpinsanen a maawananak iti namnama wenno panagtalek kenka. Ala, ngem siakon ti mangeddeng. Wen, ket ikeddengko: siakon ti agpabus-oy... Nupay kayatko pay la koma met ti mangnamnama a mangnamnama. Ngem no agtultuloyak a manginanama, kaipapananna met ngamin nga ipilitko pay la ti bagik. Isu a diakon aguray. Nangeddengakon. Nawayakan. Diakon ekspektaren a pabor kaniak ti maikeddengmo, no adda man. Wen, Joyce, ta ipabus-oykonto met laeng... Wen, nawayakan. Nawaya--no dayta ti maitutop a balikas. Nawayakan kaniak, iti ayatko--no bilang ta sibabaludka kaniak. Nawayakan kenkuana, ken ni Cedrick. Nawayakayon. I'm sorry ngem kayatko a patien nga ay-ayatem pay la ni Cedrick. Forgive me of this thought. Ngem isut' kaasitgan a pattapattak. Diak met ketdi aw-awanen ti panagtalekko nga ay-ayatennak pay laeng met. I know you love me. This is possible: nga agayatka iti dua. Ket maawatanka unay itoy a banag. Ammok ti pannakariribukmo. Saan met ngamin a talaga nga asi-asi ti sasaadem. You're in a dilemma. Ngem ita, adtoy, I'm resigning myself, my part. Tapno malpasen ti amin... Don't worry about me. Don't pity me. Sanayak metten nga agsakripisio manipud pay idi, ammom dayta. Sanayakon nga agibtur. Kabaelak daytoy. Awatek ta isu, di bumurong, ti talaga a gasatko. Anyway, there is joy in sacrificing. As long as it's for the sake of love. Ken kaniak, as long as I'm doing it for you, for you again, and for my friend Cedrick. Ken maysa, I'm guilty ket rumbeng la siguro nga ikarok ti babak ken biddutko... Yes, I'm withdrawing. Ngem dina kayat a sawen a dikan ay-ayaten, Joyce. Ay-ayatenkanto latta. It's eternal as long as I'm existing. Ammom unay dayta. Ngem kayatko manen nga ibaga kas palagip nupay ammok a ti pannakaammom ket patinayon a pannakalagip. Ay-ayatenka, wen, ket isu ngarud nga itedko ti wayawayam a patiek nga isu laeng ti makagubuay iti turning point tapno masarakam ket magun-odmo ti ragsakmo. Wen, ti ragsakmo nga isut' tarigagayko ken kaipapanan ti panagayatko kenka... Nagut-ot a pangngeddeng, Joyce: ibabawik metten ti kallaysata. Italekka manen ken ni Cedrick. Dimo pakadanagan dagiti konsekuensia. Maawatandanto kas iti pannakaawatko. Nupay diak ammo no ania ti sawek kadagiti maseknan idiay probinsia itoy a panagawidko. Wenno uray ipakaammok la koma ti problemata. Makaammonton. Siakton ti agpalawag. Siakton ti mangrisut. Ta siak met la ngamin amin ti nangaramid itoy a parikut... Agyamanak laengen iti amin. Makaanayen a ragsakko. Thank you for your existence, for yor truth, for your self and being yourself. Kangrunaanna, agyamanak iti ayatmo, for your love that I'll wish and cherish forever... Kastan... Wen, kastan, Joyce...
(maituloyto)
|
