Burnay | Hulio 1998 | Daniw | Diak Mailawlawag

hulio 1998

s a l a y s a y

Balikbayan
ni Johnny Escobar Atiburcio

s a r i t a

Tallo a Surat
ni Art Tolentino Ignacio

b u k a n e g a n

Bukanegan
ni Ricarte Agnes

d a n i w

Diak Mailawlawag
ni Art Tolentino Ignacio

Kasano a Malipatanka,
Calayab?
ni Gladys Menor

Saan Met Ngamin
ni Roy V. Aragon

Nadumaduma
a Senario ti Rikna
ni Roy V. Aragon

n o b e l a

No Duduaem Pay (6)
ni Roy V. Aragon

g a l e r i a

Retokado: Sumagmamano
Nga Ala 3
ni Roy V. Aragon

k d p y

Burburtia
ni Andy Barroga

diak
mailawlawag
ni Art Tolentino Ignacio

diak mailawlawag
        no apay nga agkanta dagiti kulibangbang
        no apay nga agmisuot dagiti rosas
no apay a makuneskunes dagiti papel
        ken no apay a matukkotukkol dagiti lapis...

diak mailawlawag
        no apay nga agkulipagpag latta dagiti pul-oy
        no apay nga agtulatid latta dagiti ayug
        no apay nga agbuabo met dagiti turod
ken no apay nga agarigenggen met dagiti rangkis...

diak mailawlawag
no apay a maruruka dagiti ulep
        no apay a makasinit dagiti bayakabak
no apay nga agaapa dagiti tambak
        ken no apay nga umasug dagiti kutibeng...

diak mailawlawag
no apay nga agrukob dagiti sagumaymay
no apay a bumlad dagiti ramut
no apay a pumarasipis dagiti tedted
        ken no apay nga agalikuno dagiti kinelleng...

ngem ammokon no apay
        nga aglinnaaw iti agmatuon
        a mangpabussog iti kapatagan
        ken no apay nga agsaning-i
        ti apagsingising nga init!