|
Bukanegan
ni Ricarte A. Agnes
AGIWANWANWAN:
Iti nagan ti GUMIL, kablaawankayo
Iti naimbag a rabii, patpatgenmi a Kaili
Nga immay immadani, ken immay mangsaksi
Iti pannakaisaad ti korona ti pagrukbabanmi nga aribai
Dagiti mannurat iti Iluko ditoy Oahu, Hawaii
Paset ti kultura Ilokana, intay tagibenen
Intay pasantaken, ken intay parang-ayen
Inkam ngarud iparang, maliplipatanen a Bukanegan
Tapno adda tuladen, sumarsaruno a kaputotan
Iyam-ammok ngarud kadakayo
Iti kanawan, isu ni Segundina
Maysan a balo, ngem lung-ayna ti makaay-ayo
Iti kannigid, isu ni Anacleta
Maysa a dibursiada, ngem anian a santakna
Agsupadi a panunot, kas igam nga agpingki
Ti iburay dagitoy dua, agkabsat a babbai
Tapno marisut ken mabukra daytoy a parikut:
Siasino kadakuada ti rumbeng manen a makiasawa?
Ayat ti maymaysa a lalaki ti inda pagsalisalan
Iti panagrinnupirda, inkay imdengan
Ti anamonganyo, inkay palakpakan
Tapno isunto ti inkam pagrukodan
No siasino kadakuada iti addaan karbengan
A makiasawa iti "one more time"
Umuna nga intay' denggen ni Ading Segundina
Santo isaruno ti rason ni seksi nga Anacleta
Nabara ngarud a palakpak intay' kadakuada ipasabat
Siasino kadakuada ti addaan naimbag a gasat?
SEGUNDINA:
Saksik ni Apo Dios saanko a nagayatan
Ti panagsublik panagbalinko manen a balasang
Ngarud saanko a pakabasolan ken pakailunodan
No aklonek ti ayat nga idatdaton ni Kalantangan
No dumteng ti rabii umagibas dagiti lagip
Daydi naanus a lakayko innak ilillili
Paturogennak kas maysa a tagibi
Ket bantayannak iti agpatnag
Tapno iti innak pannakairidep saanak a matiag
Nasam-it ti turogko iti sidong dagiti bituen
Nawada ti tangatang, naslag pay diay bulan
Nakarit dagiti turod iti bandanat' abagatan
Ken nalangto dagiti nalnaawan a pan-aw iti amianan
Ngem anian ta simmangpet ti batibat
Ginuyodna ni Inggo a kasilpo `toy biag
Inyadayona iti disso, lugar a diak magaw-at
Ket nabatiak a mawaw iti imnas ni ayat
Nalangeban ti tangatang, nasipnget dagiti rabii
Nagari dagiti kuriat, napaksiat dagiti kulalanti
Ket daydi naimeng nga umok, nagbalinen nga aragaag
Simmallin ti saligemgem ta awanen daydi nabara a takiag
Kakabsat indak ngarud palakpakan
Kas pammalubosyo innak manen pannakipungan
ANACLETA
Amin a pasamak ditoy daga, kananakem ti Dios Ama
Amin a tao ken parsua, nayanakda amin nga adda akmenna
Aggigidiat ti gasat, ngem awan naipangpangruna
Ditay agladingit ken agpabasol ta ay-ayatennatay' a padapada
Nupay kasta diak malisian ti di agsangit
Ta limdo ti biag isu ti akem a nabagik
Daydi matrimonia ken panagsinnapata
A patay laeng ti mamagsina kadakam a dua
Sinaksian ti ninong ken ninang, uray la a dinosdosena
Ngem saan a nagbayag, nagin-inut a nagrakaya
Ket daydi singsing a tanda, nagungap ket nagpekka
Tunggal malem tiempo a sumipnget
Dangdanggayandak dagiti kundidit
Makipagriknada kaniak nga agsangsangit
Ta ni lakayko a paspasungadek saan manen a sumangpet
Iti sardam urayak la a maal-aliaw
Kadagiti natibong nga uni ti kullaaw
Ngem awan, ta awan pagkamangak
Ta daydi barukong a pagsalsalipengpengak
Addan iti sabali nga arpad
Kakabsatko, didak koma kagura
No daytoy naganus ken nalap-it a bagi
Innak manen italek ken ni Estonique
Ta bareng ti ragsak a naipaidam kaniak
Sagrapek sakbay a mauyos toy biag...
SEGUNDINA:
Ti gasat ti tao dua ti makaigapu
Aramid ti Dios ken aramid ti tao
Anansata wayawaya ti panagpili iti asawa
Saguday nga inted ti Dios a namarsua
Ti gasat ni Anacleta awan akimbasol no di isu
Ta namati ken nakayawan iti bigotilio ken macho
Nataraki a lalaki kasla pudno no agsasao
No agpasiar nakasapatos ken nakaterno
Galad ti manangallilaw ken mananglimlimo
Ni Anacleta, piman, dina ammo ti laud ken daya
Nagayat a dina ammo ti puon ken gapuna
Saanna ngarud a rumbeng ti inna manen a pannakiasawa
Ta pannakairubo agur-uray kenkuana
ANACLETA:
Makaipas dagiti balikas nga insawangmo, Manang Segundina
Nadawel a kas baybay iti bulan ti Agosto
Nagasang a kas iti silit' sairo
Nadagem, pagkupitenna daytoy barukongko
Uyawennak ta diak ammo ti nagpili
Iti kapinnungan, kaliwanliwa a lalaki
Ngem uray sika, darasudoska met a nakitinnali
Ta idi simmangpet daydi Kayong Inggo manipud Hawaii Grande
Nagmayatka a dagus idi immay kenka immuli
Nga uray ulona ti kalbo, ngipenna ti pustiso
A no magna, kasla agbirbirok natnag a sintabo
Ta uray nakasarukod, takderna lattat' ariskubbo
SEGUNDINA:
Anacleta a tarabitab, nalaingka nga agputar iti sao
Di mapilaw nga indibursionaka ni Claudio
Ta dina maanusan dayta a galadmo
A mangsarsarita ken manguy-uyaw iti padam a tao
Dimo la ipagpagapu nga awanen daydi Inggo
Ken laglagipem koma a diak nagayatan ti nasapa a nabalo
ANACLETA:
Kasano a dika nabalo a nasapa, kabsatko a Segundina
Ket nangpilika iti lakay, duduogan nga asawa
Aksawna ti saggaysa, ta ag-arthritis ken ag-rheuma
Atibayem pay no kakaisuna a mapan sumalpa idiay gloria
Ket no saan nga aginana wenno ag-time out iti ngalayna
Aganangsab a kasla ag-ashtma ken agpugsupugsot ti angesna
(Diak la ammo no kasanom a nairusok!)
SEGUNDINA:
Kaska la salaksak nga agibambando
Pananguyawmo iti daydi lakay a lakayko
Pagkarkaritmo ni Adonis a Claudio
Nga agkabanuag, nabisked ken macho
Ni Claudiom nakaam-amak no makakaldo iti lauya
Wenno makasida iti nakamatisan a lasona
Abakennat' nakaalimon Viagra, bun-asna ti nagpaiduma
Ti rungsot ken pungtot 'diay igamna awan makaatipa
Ta saan nga agkurno uray makirupak kenka iti mamindua
Ti pagdaksanna, mapan pay agdakiwas iti kosina ti karruba
Ket lukibanna ti kelleb ti banga ti akinbanga
ANACLETA:
Ti panagbiddutko a nangaklon ken ni Claudio
Saan a siak laeng ti pilawenyo
Ta idi immay kaniak nagrayo, inlemmengna ti kinapudno
Nanglimlimo ket saanko nga ammo ti aramidna a kinapilio
Ken ti galadna nga agarem iti tunggal lugar ken disso
Ngem ni Manang Segundina, agdadata a basolna
Ta nayat a nakiasawa, inawatna nga awan duadua
Ni lakay Inggo, uray nabatad a kubbo
Ken kubab, ken kalbo (Pakawanennak, Diosko!)
Gapu ta daytoy a tao ket maysa a Hawayano
SEGUNDINA:
Agsardengkan nga agsasao
Ta no saan, arrabisek dayta subsobmo
ANACLETA:
Padasem ti umasideg, ket sagidennak
Kitaem no dika makaraman iti tungpa nga agallabat
AGIWANWANWAN:
Hep, hep, saankayo koma nga agkasta
Dikay' agrinnanggas, dikay' agapa
Iti Bukanegan, sao la ti aginnala
Rason a denggen dagiti adu a bisita
Ading Segundina, agparbengka koma
Ammok a nakas-ang ti biag ti balo a kas kenka
No dinaka mapili ni Estonique, dika mapukawan iti namnama
Inka makibalroom dita HBDA
Adut' ganador nga agur-uray iti kapareha
Sika met, Anacleta, Adingko, bagim ti agpakumbaba
Dika makipinnengnget, saluadam ketdi dayta sadia
No dinaka mapili ni Estonique, nagaduan sabali a lalaki
Mapanka idiay 19 Puka, makisala ken maki-karaoke
Bareng makakayawka iti nabisked, bigotilio a Navy
Ituloytayo ngarud ti Bukanegan
Ti rason ti tunggal maysa intay' imdengan
Kiddawko ngarud, intay' manen ida palakpakan
SEGUNDINA:
Ladingitek, Kakabsat, ti innak panagpungtot
Diak nagawidan ti riknak a rimmasuk
Ta ngamin ti dayaw daydi lakayko diak itulok
Nga inna ibambando ken imudmudumod
Pudno a daydi Inggo ket lakayen idi maasawanak
Ngem diyo koma ipapan a saanko nga inayat
Nupay tuppol, ken kubbo, ken pultak
Adda met kenkuana ti ganyadas a magustuak
Diyo la ngamin ammo, a natibker ken saan a mapilko
Ti pangeddeng ni Inggo, rasonna ken prinsipio
ANACLETA:
Kasano ngamin a di nalaka nga agpungtot
Ket baketen dandanin ag-menopause
Ugalina ti di makaan-anus
Galadna ti makiapa ken makipinnungot
Pudno a ni Claudio ket napuner ken macho
Ti paludipna uray la a sumalpot iti puso
Uray saan a pudno, no ibagana ti I love you
Makaallilaw, mapagtung-edna pay ni Kris Aquino
Inayatko ni Claudio, dayta ti pudno
Iti amin a kararua, puso ken rikna
Ngem kasano a diak rumuk-at ken makisina
Ket winarasanna iti bukel dagiti amin nga Isla
SEGUNDINA:
Matmatanyo 'toy bagik ket saan pay a nanasanas
Kas pay la sabong ti rosal iti bigbigat
Ta no bilangek ti rabii nga inkam' pinagkaatag
Saan a makunos dagiti ramay ti ima ken sakak
Daytoy sampagita ket busel nga apagbingngi
Agur-uray iti arbis iti tunggal rabii
A mangsebseb wenno mangdapadap
Iti imnas ken sam-it ni ayat a diak nasagrap
Saanyo koma nga ayunan ni Anacleta
Ta aglaplapunosanen iti ayat a nabagi
Ta ni Claudio ket napuner, nabisked a lalaki
Panagkunak, every nite, maka-times-three
Kakabsat, anamongandak
Agdadanggaykayo nga mangpalakpak kaniak
ANACLETA:
Iyarigko ti bagik iti kappisi a mansanas
Natubbog a kas iti dalayap a lumlumdag
Naayamuom a kasla iti nalussayat a bayabas
Nasamsam-it pay ngem lansones idiay Batangas
Napno iti karayo dagidi sardam ti Hunio
Puyupoy ti angin simmangbayda a nalailo
Ngem anian ta simmangpet ti naranggas a bagyo
Ket dagidi agan-anit-it a basar, nawarada a narungrungdo
Padpadasek a lagipen dagidi kanito nga agapun ni Pugo
Iti nadam-eg a kapan-awan ken turod a napnoan diro
Sungdo ni ayat ken karayo, sadinnon ti ayanyo?
Didak panawan, diyo ikalang 'toy lumlumdaang a puso
Kakabsat, adtoyak a pabitibit
Ti palakpakyo ti mangikeddeng iti masakbayak
AGIWANWANWAN:
Patgenmi a Kaili inkay nangngegan
Kalikagum ken araraw dagitoy dua a nagsubli a balasang
Ita ngarud inkay' ida kedngan
Pagsinnublatek ida nga iparang
Dayta palakpakyo diyo ipaidam
Aglalakpak ti umanamong ken ni Segundina
(mangallingag)
Agpalakpak ti umanamong ken ni Anacleta
(mangallingag)
Kakabsat, agyamanak iti regget nga inkayo impamatmat
Ngem ladingitek ta agpadat' pigsat' palakpak
Ngarud awan kadakuadat' naabak, awan met nangabak!
|
