nadumaduma
a senario
ti rikna        
ni Roy V. Aragon

1.
nakaisem ti nakamassayag a manekin
a lamlamayen dagiti sugador ken mammartek:
sangsangitan dagiti mabayadan a mannung-aw.

2.
nagmusiig ti balasang iti naimdenganna
                                                           a kundiman
darasna nga insubo iti component ti compact disc
ni vanilla ice: tinupraan ti rap ti tapat ni
                                                           kaayan-ayat.

3.
gumarikgik ti puta a kumitkittab iti mansanas
a buntok iti sumagmamano a kapisit' dollar
                                                           a bayad
ti ganggannaet a kumaw: ayat iti agpatnag.

4.
napakuyep ti bulag nga agpalpalama idi
                                                           maapirasna
ti rupa ni rizal iti metal nga impuruak
                                                           manangngaasi
a parsua: kirmet! banang-esna iti donia
                                                           a narnuoyan
                                                           alahas.

5.
nasakit ti nakem ti baro a napaay iti ayat
nangala't punial tapno biagna innan gudasen
ngem, sakbayna: iti ospital, nagpaitaray
                                                           nga umuna.

6.
agdiwigdiwig iti garadugod boksitna ti dungrit
                                                           nga ubing
a mangbuybuya kadagiti di mangmangan a teacher
                                                           iti bangketa
ti adal ket naammuanna: ti bisin, mapedped iti
                                                           panagpabisin.


1992