kasano a
malipatanka,
calayab?
ni Gladys M. Menor

Kasano a malipatak dagiti sumangbay nga agsapa
a lukagennak ti taraok dagiti tapingaran
tapno ti bagi a kinayetketan ti lammin mapan
umadaw iti bara iti mapupuoran nga arutang?

Kasano a malipatak ti buya dagiti kinelleng
a naaplagan iti bimmalitok a dawa
a pagbitbitinan dagiti kristal
nga imbati ti angep a nagsaknap
iti napalabas a parbangon?

Kasano a malipatak dagiti agmatuon
a naariwawa dagiti aggiginnantil
a kaadalak idiay Holy Spirit
nga immay nagsaramsam iti naalsem
a bunga 'diay bugbugtong a dugmon?

Kasano a malipatak ti kanta dagiti tumatayab
kadagiti sanga ti kaimito ken tiesa
ken ti panagampayag dagiti gikgik
iti nakaas-asul a tangatang
no dumteng ti nalamiis nga amian?

Kasano a malipatak dagiti adalem a sardam
a riingennak dagiti agun-unnoy nga ayug
ken aweng dagiti makulding a kuerdas
iti batog ti nakabalunet a tawa?

Wen, kasano a malipatak amin dagitoy
nasasam-it a kanito iti sidongmo, Calayab?
(Saan, dimo kunaen a naililiakon
iti dungngo ti sabali a barukong...)