|
siak
ni john b. buhay
ragsakek man ‘toy biag
ngem di met rumukma ‘toy liday
a naibinggas iti kinatao.
ngamin, bisikdak daydi naulaw
a rabii, siak a rasaw ti kinamaag!
ammok, lasagko daydi agbibiag iti daniw,
sarita nga awanan paulo, di pay napauluan
ta dinto mapauluan, ta naipablaaken
iti publikasion da gartem ken lailo
ken gargari. siak a naigibus iti rugi
ti dramat´ siled, pagarian ti kinalasag!
ita, mangmangngegko met, arasaas iti siled
a timpuarak. addayta ti rubrob ti apuy
mangdildilpat di pay napisokan
a kaldero ti biag... ket pagammuan,
manen, ah! agsublisubli
a lagip, unayen a kinamaag!
adu a sarsarita ti nangbuniag kaniak
iti nagan a kabusor, karimon, nakababain,
maysa pay a napadrinuan da imuko ken igam
iti bendita iti isu manen a siled;
wen, siak a rasaw ti pannakaulaw
dagiti maag...
ngem nagungarak,
sinapulko daydi nagsabatan
da tedted ken lili tapno iturayak
daytoy maikadua a siak, tapno siak
maipasngay manen, tapno addanton
paulo dayta a sarita: siak
|
