namnama
ni art tolentino ignacio

Saanak a pilay: makatakderak
Saanak a bulsek: makakitaak
Saanak a tuleng: makangngegak.
Bay-annak a rumkuas, mangtunton
Sabali a dana daytoy a lubong.

Salansanekto dagiti bantay a naisay-isay;
Damiliekto dagiti turod a nargaay
Anusakto dagiti padeppa nga ibaklay.
Ta natibkerakon a mangalamano, awan pagpilian
Nakersang a dakulap ti nakaparsuaan.

Ammok a sabtennakto latta dagiti saplit;
Ket mangburiborto dagiti waneswes ti sangsangit
Kumaramotto ti kuko dagiti kimat ti ladingit.
Sa tibnokanto pay dagiti kimraang a pagpaggaak
A mangpadasto a mangpirpirsay ti naatap
       nga arapaap...

Ngem kumpetakto uray iti ngudo ti tadem;
Basatekto ti dalluyon dagiti umallilaw a pakinakem
Bulonakto iti kired ti agsusukot a kinasimbeng.
Ket no mapurosakto a madaleb latta,
       kas pagarigan
Yad-adayom, Apo, ngem bumangonakto manen
A di mainsasaan.