sermon  
iti karayan  
(maysa a bigat iti rio de laoag)  
ni peter la. julian  

Gudua't bagina iti kadaratan,
Arig mangaskasaba ti gabat
Kadagiti naariangga a tukak iti rabaw
Dagiti lumlumoten a bato.
Malagipko man dagiti Katoliko
Iti simbaan ti ilimi:
Tanawtawda a tanawtaw,
Kasda la adda iti tiendaan,
Idinto nga agraraed ti timek
Ti pannakabagi ti Dios
Iti depektibo a mikropono.
A, kaykayatko a saraken ti agnanayon
Iti daytoy agbugbugsot a karayan
Iti daytoy nabaneg a rangtay
Kadagita a bantay
A namantuan iti angep.