Diakto ngatan makasarak, imnas
pumadpad libnosmo, sudi ken kinapintas
ta naisaluminaka, naisangayan, o! ayat
ket `ta nagsaway a pusaksak, lagipko't tungpal biag...

Ta kaanonto koma nga alintataok mapukaw
mulagat-kusilap dagita matam a kimmullaaw
kakaslada wan tawsan wats a bombilia nga aggarawgaraw
a patinayon a batibatkot' rabii ken aldaw!

Ket `ta bibigmo la unay nga aagkan
idinto a sangkapulagidmo't lipstik a sangadanganan
nakangisngisit latta, puskolna tallo a ramayan
ruangan rukapi nga isem ken pallilit a sangalapayagan!

`Ta met agongmo nga innak no kua pidelpidilen
kasla palatang tiniog a nailuspak dita rupam a kupileng
abutnat' kakasla kueba, nakalawlawa, nakabutbuteng
apon dua a mangmangkik nga agin-innarem!

Ket `ta buokmo a naynay nga am-amloyek
nakaang-angrag, makatawenen dim' met la sagaysayenen
umok sangapamiliaan a bao ken billit-tuleng
nagkamangan pay sangabatalion a kuto ken timel!

Dagita gurongmo, malaksid a kinurad
nakakurkursing pay iti kakasla siksik-karpa, o, imnas
limmandok a maselna, abakna nuklear nga armas
no maipang-or ken Kingkong dagus nga agkuripaspas!

Ket dagita luppom, wow, idi aprosak
barbonan iti nakapuspuskol, nakapimpino, nakamaymayat
ngem anian kasla budo ti sabawil simriam iti riknak
makabulanak a nagkudkudkod, gudgod ti innak naganab!

Sabang panagpatpatongmo, di kumikit ni Mayyang
no magnaka, dalan maukoparan, indaka lislisian
maipullasit tattao a masidol kinnikinnim a masagsagawisiwan
panagyakayak siket-patongmo abakna amin a kono ken kiskisan!

Ket 'ta barukongmo a kabubun-asan
kababaknangan, katatangsitan
ngem anian nasukalak kasla met gayam nadalanan pison
idi matnag dua a bunga't tangkoy nga inka binungon!