di kadi ta ayat met laeng daytoy
ti berso a binungon ti saem,
kas idi kalman laeng, idi mangrugikami
nga agdaliasat iti kapanagan.
idi talaytayenmi ti tambak
ti bisin, ket dinungdung-awanmi ti gawat
immansayagmi dagiti apges ti ukradenmi
nga araraw ti dakulapmi, a pammadso met laeng
iti kalsada ti anges—ay, agibitkami
iti pannakaipasngaymi a ganggannaet,
kas iti panangibitmi iti paannakaipasngaymi
iti inaldaw a kalbario ti itanggayami a saem
dagiti sililisay a siled dagiti boksitmi,
inaldaw nga ilansanakami ti garadugod
ken apges dagitoy managlanglangan nga isemmi
uray dagiti arep-epmi, ituredmi met
nga isalda, kas katured, wen, ti kullapit
a presidente—-a mangyutang iti sangit
ti pagbagasan dagiti sennaay ti balinsuek
a lubongmi, kas kakuttong dagiti ararawmi
a balinsuek, no kuan gaoenmi iti padaya
ken pammunpon ti matalimudaw nga angesmi.