ikararagmo a siak koman `tay agpukaw
itayab ti angin santo marunaw

ikararagmo a siak koman `tay lumned
iti baybay no agbangkaak iti limed

ikararagmo a mapulsot koman ti angesko
a diakon makariing iti pannaturogko

ikararagmo a siak koman `tay malmes
iti buslon ti lua ken dara a dumges

ikararagmo a siak koman `tay maidalit
matay iti gura ken adu a sakit

ikararagmo a diak koman maibturan
intedmo nga allawig ken pammarigat

ikararagmo a koman `toy biag isina
ti sabali a kararua ken sabali nga ima

ikararagmo, ayatko, ti pannakaisagmakko
ti pannakadadaelko, ti ipapatayko

ikararagmo nga awananakon iti masakbayan
ikararagmo ti innak pannakayaw-awan