ti kabusor  
ni peter la. julian  

ti la ngamin kalapaw ti ngudo
ti arapaap...
um-umlek ti sangaili a nangilansa
kenka iti krus nga awan ti naganna.
nangayed ti agsapa: kasano a rumkuas
ti ikkis, ti nakabutbuteng a dulluog
ti pait ken saem ken asug
iti umir-irut a kawar iti aangsan?
dimo matmatan ti pekka iti sarming:
kitaem ti sugat ken ti naliday a mata.
dakiwasem ti away ti kinaagtutubom:
rumimatrimat dagiti lugan ken silaw,
agkakadaeg dagiti sumilsilap a pasdek,
ngem awanka sadiay,
ganggannaetka kadagiti katsada.
adda met mariing a sennaay:
ti kampilan! ti kampilan!
awan ti bannuar!
awan ti malalaki iti nakaparsuaan!
ti kabusor saan a ti kayumanggi
a magmagna pay laeng iti puraw a saka
wenno ti nadangkok a kusipet.
matmatam manen ti umis-isem a rupa
iti nabuong a sarming:
a, mannaniwtayo amin!