piniritmo, naibbatam
dimo kabaelan nga iggaman.
pinidutmo iti sangadakulapan
inyasidegmo kadagita bibigmo
natnag, ta idi la a madlawmo
ti dagsenna--ti anguyob nga adda
bukona.

pinidutmo manen, itan
duan a dakulap, narnekanka
iti irut, sam-it ti banang-es
nangemkemak...
ngem inangngabam ketdi
inammolam, pinuyotam
ingget pigsa
a naggulagolan pay
dagiti sungrod
a gimmil-ayab.

napasgedam iti uray la
ti dalikan, ta dimo pulos
inibbatan, nagpapaska
a nangpuyot anguyob nga adda
bukona.