Saantayo a pimmanaw:
Agsublitayo iti daan nga ili
Iti daan nga urnos
Kadagiti naangep a lagip --
Maysa a bato sadiay, ti akasia
Iti pagserkan, ti karuotan
A nagkinkinnamatantayo,
Dagiti babassit a panagbettak
Ti rikna kadagiti aringgawis
Dagiti balikas, ti nadayag
Nga arapaap --
Dagidi nga aldaw, anian!
Naganustayo ken siwawaya
A kas tumatayab iti tay-ak.
Simrektayo iti maysa a panawen
Idi lamolamo dagiti maris
Ken naayamuom dagiti rosal
Idiay Torres Bugallon.
Ita a rabii, maitanem
Dagitoy a samiweng, katkatawa
Tapno unorentayo manen ti agsapa
Nga agturong kadagiti kalsada
Iti ikub dagiti tarimbangon
Ti naputolan a lubong.