Bulan,
idi rabii kabayatan a sitatangigka
a nakamuntar iti langit
inarasaasannak ti maysa a timek

kasla pimmandag a ridep,
pinakudrepna
dagiti matak iti esngaw
ken arasaas

impariknana ti tunggal balikas
ti ikakaradap
ti nabara nga agek ken nalalag-an nga apros
iti tunggal laslasag
agturong
kadagiti rakep ti suot.

ket bimmangon ti rusokko...

ginuped dagiti agkikinnamat
nga anges
ti bainko ket
nagpayagus

nakiinnarasaas, nakipagyesngaw

pinaaapalan
ti pul-oy ti angin
kadagiti babassit nga areng-eng,
agpabpabus-oy
iti panagdawat ti timek
agsapsapul, aggartem a subalitan
ti padana nga apuy
ti sumsumgiab a laslasag