jorge
ni jorgina delfin

Mailiwak kadagiti parbangon iti panagtutubo
No nauneg nga asul dagiti langit
No napintaan dagiti ulep
ken no dagiti sairo agrikna kas santo

Mailiwak iti sumingising nga init
Manipud iti kaadalman matmaturog a taaw,
Iti nabnabiag nga uni
Ti agawid a billit-baybay

Mailiwak kadagiti milagro ken sumipnget
Iti labbaga ken balbag dagiti naimnas a buya
Marmaris a naibuyat iti nagsikkuan kapanaran
Pumusay kas kaniak iti maymaysa a pagpatinggaan

Kailiwko ti rabii a law-angna namituen
Dagiti arapaap a patinayon nga umassibay
Aglumenda kadagiti linnaaw ti agpatnag
Pumanawda a mangbuybuya panagleggak ti bulan

Mailiwak iti naulimek a kaltaang
Ti di kaykayat nga angep kadagiti naliday a susik
Kailiwko ti tudo iti kaltaang
Kailiwko ti tren, kailiwko ti eroplano

Kailiwko dagiti pagayam, katawa ken lulua
Kappia, ayat ken naibelleng a buteng
Kailiwko ti taeng a diak naam-ammuan
Ken sumagmamano a kanito ti panagmaymaysa

Kailiwko dagiti lallay ken daan a kansion ni ayat
Ti palimed ti lubong ken dagiti naitanem a biddut
Iti puso ti agay-ayat a naisawsaw iti arak
Kailiwko ti rikna ti kinatalingengen

Mailiwak iti sibubukel, lukditna a lubong
ti kinasimbeng a nangpanaw kaniak a silalammin
ken iti pay amin a kinaulbod a kinabbalayko
ken iti amin a tagainep a di met pudno

Kailiwko ti bagik ti ubing kaniak
Ti adu a kinatao a nagbalinak
Kailiwko ti sumagmamano a nabangbangluan a gagem
A nakalemmeng iti pribado a sanktuariok

Mailiwak iti biag ti anges ti biag
Iti diak panagbalin nga asawa ti saem
Kailiwko ti patay dagiti misteriona
Ti kari ti pannakayanak manen a kitaek

Mailiwak iti awan ngem iti isuamin
A maited ken saan nga itden ti biag
Kailiwko dagitoy a panunot ita ta malmaldayak
Manipud ita, ti pudpudno a kailiwko ket sika