Bungaka man dagiti dardarepdepko,
Inka riniing `toy malmalday a puso.
Dagita maris ti isemmo
Rimat dagita matam a nakaay-ayo
Dagita tinubtubay a kallidmo
Seniales ti makapikapik a sam-it ni karayo.
O imnas, pagraywan `toy puso
Waknitam man `toy nakullaapan a panunotko
Biagem kad' `toy ayat a nakeltay
Silnagam `toy biagko a nakaay-ay-ay
Dika kad' ipaidam dayta pannaranay
Paragsakem kad' `toy pusok a malmalday
`Ta pannagibim, inka kad' iburay
Sika la ti namnama `toy arapaapko a natungday.
Agsublika, dinak kad` paidaman
Iti kangitingitan ti law-ang
Saannak kad' a baybay-an
Ta diak kad' agkalkalautang
A kasla lawlawigan iti tengga ti tangatang.
Sinurotko dagiti tugotmo,
Maris ti anniniwanmo nga umad-adayo
Nagpukawka a kas milagro
Nagkupas a kasla bullalayaw iti imatangko.
Agsublika dinak kad' paidaman
Iparipiripmo ti innak kenka nagkurangan
Iti pammategmo dinak kad' paidaman
Ta sika la iti innak pangnamnamaan
Mangsalbar iti nakas-ang a nagbanagan
`Toy ayatko a nakalkaldaang.
Un-unnoy `toy pusok
A di agressat
Biag `toy biagko, agsublika kaniak,
Imatangam ti panagarubos dagiti luluak
Maibturam kad' nga agladingitak?
Kinakuspilmo man ti makaigapu
Sam-itek ti pumusay iti imatangmo
Aginana iti sidong ni karayo
Pangngaasim agsublika iti arpadko
Kaliwanliwa, agasam `toy naukritan a puso.
