Naipasngay ni Pete B. Duldulao iti Bugnay, San Nicolas, Ilocos Norte idi Abril 27, 1966 kada dati a Brgy. Capt. Mariano Villa Duldulao ken sigud a Carlina Valdez Butay. Buridek iti dua nga agkabsat. Tinurposna ti elementaria iti Bugnay Elementary School, sekundaria Iti Filipinas National High School (San Nicolas National High School Itan), San Nicolas, Ilocos Norte. Nangala iti BS Industrial Educatlon iti Mariano Marcos State University-Institute of Technology iti Laoag City. Ditoy a nangrugi ti essemna nga agsurat idi makaatendar iti literary seminar/workshop nga lnsayangkat ti nasao a pagadalan, a nangyalatanna iti malka-2 a gunggona iti naangay nga on-the-spot essay writing contest.
Idi 1987, nagun-od ti saritana a "Mabekbekkel a Kalintegan" ti maikalima a gunggona iti salip iti sarita nga inesponsoran ti GUMIL Hawaii. Impablaak ti Bannawag ti umuna a saritana iti dayta met laeng a tawen, ti “Ubingka Pay” a nairaman iti IRIC a libro ti Iloco Research and Information Center a rimmuar idi 1988. Idi 1991 inyalat ti daniwna a "Partaan: Idadateng ti Armagedon -- Pannakaipasngay ti Maikadua a Genesis" ti maikadua a gunggona iti salip nga inesponsoran ti Angelo Marcos Barba Awards for Iloco literature (AMBAFIL). Iti 1993, nagun-od ti daniwna a "Birhinia" ti umuna a puesto iti salip ti daniw nga insayangkat ti National Tobacco Administration (NTA). Kaudian a naawatna ti Naisangsangayan a Pammadayaw a nagun-od ti salaysayna a "Filipinas, Nawayaka Kadin?" iti pasalip ti Dr. Juanito Basilio Chua Literary Awards 1998-1999. Nagpaay pay a Fellow iti Iluko Short Story iti 1997 U.P. National Writers Workshop a naangay iti Baguio City.
Nagpaay a business manager ti GUMIL Ilocos Norte (1991-1993 ken 1993-1995). Nag-presidente (1993-1995) iti GUMIL San Nicolas. Isu ti presidente ti GUMIL Ilocos Norte iti agdama ken maysa kadagiti kameng ti hunta direktiba ti GUMIL Filipinas.
Maysa a mannalon, makumikom kadagiti tabako ken bawangna ken iti plantasionna iti mangga ken gmelina. Baro pay.