|
Ah, biag
Diakon agdarepdep, Diakon mapaggidiat Ti pudno ken arapaap. Arapaap: kinapudno. Kinapudno: arapaap. Natayen kunada Ngem anansata makitak Nga aggargaraw Dagiti bukel ti matana. Kimmettelak iti busel Ti kayanga. Nagukrad ket nagsampaga Iti lamisaanko. Idi rabii, nagam-ampayagak Iti ngatuen ti Burnham Park. Itay bigat, nagdissoak Iti naangep a karuotan. Adda manen dagiti billit. Ket ania ti pagsasaritaanda? Twit, twit, tararit, Tsirp, kwirk, ik, twit! (Manipud iti libro nga "Umayka Manen, Ganggannaet/Come Again, Stranger", koleksion dagiti napili a dandaniw iti Iluko ken Ingles ti autor) 
TI AUTOR:
Nobelista, mannaniw, sumasarita, translator, periodista. Tubo ti Siudad ti Laoag. Nagadal idiay University of the Philippines a nangalaanna iti BS in Foreign Service. Agdama nga empleado ti gobierno (iti Philippine Information Agency iti San Fernando, La Union) ken correspondent ti Philippine Daily Inquirer. Lecturer iti panagsurat ken panagiwarnak, agpapaay pay a hurado kadagiti pasalip iti Literatura Ilokana, ken kas maysa kadagiti mangibagbagnos iti GUMIL. Pasig a lallaki dagiti annakda ken ni Estelita Co ti Oscariz, Ramon, Isabela.
|
