|
Manarsaritakamto laengen
1. sinarsarita kano daydi apong nga idi awan pay ti sag-ot batbatenda ti kapas iti lalat a tibbian sakbay a maipanait iti sunay ken maisagpat iti pagablan. ti kawes idi ket sa-iluko a nakersang. ngem sinarsaritana kano laengen ta addan ti nylon ken rayon. 2. sarsaritaen met ita ni tatang nga idi awan pay ti pa-social dance managtokar met idi isuna iti biolin, gitara ken banduria kadagiti parambak ken pasala. hasag idi ti silaw kadagiti salonan ngem manarsarita kano laengen ta addan ti bumanugbog nga stereo component. 3. uray siak manarsaritaakto met kadagiti arado, suyod ken palpal ta addan ti kubota ken kuliglig. ti putotko ket manarsaritanto met. ti apokok manarsarintanto pay. malaglagipminto met dagiti naglabas a paset ti kultura a naakas. ngem aginggakaminto la a manarsaritan ngamin, ipangnggegmi iti kaputotan a gayam panagbalbaliw ti ayus ti biag. 
TI AUTOR: Naipasngay ni Joel B. Manuel idi Oktubre 18, 1969 iti Balioeg, Banna, Ilocos Norte. Tinurposna ti kinamaestro iti Mariano Marcos State University College of Education iti Laoag City ket iti agdama, mangisursuro iti Physics ken English iti Caribquib High School iti ilida. Nasapa a timmaud ti essemna iti panagsuratan. Nakaipablaaken kadagiti salaysay idi adda iti haiskul. Nagab-abak kadagiti press conference iti probinsial ken rehional nga agpang. Maysa a premiado a mannurat, adun ti pammadayaw a naawatna kadagiti nadumaduma a pasalip iti panagsuratan iti Literatura nga Iluko. Adu metten a daniw, sarita ken salaysayna ti naipablaak iti Bannawag ken dadduma pay a publikasion. Naipabuya payen kadagiti piesta ken okasion ti eskuela ken barangay dagiti putarna a makaray-aw a drama iti entablado. Isu ti maysa kadagiti Fellow iti Ababa a Sarita iti 1998 University of the Philippines National Writers Workshop a naangay idiay Baguio itay Abril. Baro pay.
|
