BURNAY E-zine Volume Number 4 - Daniw - Agtig-ab ti lubong

Agtig-ab ti lubong

asaken ti antutungal ti bangkag.
kutkuten ti ararawan ti pitak a rukib.
sarigsigan ti alukap ti lumot. umanal-al
ti angga-angga a kamkamaten ti birabid.
nakadata ti tabtaba iti papag a lungog.
iti rabaw ti libeg, agmamadiong (ngem saan
ketdi a maarasaw dagiti bisukol, leddeg, bukaig,
beldat, agurong, duriken) dagiti kutokuto't danum.
aglagto dagiti tukak.
agsuyaab dagiti karag.
agpanirpir dagiti dudon.
sumuksok dagiti kuriat.
agpauy-oy dagiti lawwalawwa.

ket agrasaw dagiti kelleng.
ket masiglot dagiti tambak.
ket bumlad dagiti aripit.
ket sumuyop dagiti kali.
ket lumteg dagiti pakyas.
ket maburuang dagiti pangawidan.
ket agriaw ti inaraduan.
ket agangsab ti sinuyudan.
ket malmes ti tangkig.
mabsog ti daga.
mapnek ti bingkol.
agtig-ab ti lubong.