|
Pagammuan, rabiin (ken ni tata immong a kantero) nalawa ti kuarto ita a bigat kas kauneg ti sugatmo iti maysa a suli ti sagumbi dagiti maulit-ulit a lagip: yanmo idi awan pay dagiti buong a botelia ti serbesa ken kuppit a latlata iti taaw? idi rabii, impatayab ti ballailaw a pagtokaran ti kantam idinto a nagallongogan iti naasuk a paginuman ti katkatawa ken ti gumpo dagiti immawer a tawen. kastoy koma ti napasamak -- saan, saan -- kasdiay koma ketdi. ti init nga agkarkaradap itay iti desarming a tawa immulin kadagiti atep: mulinaw nga imuko ti pananglagip, natadem a kas iti iking ti agsapa. ti kanito kenka ket nagango a bulong iti nadagaang nga aldaw ngem masapul nga umkis dagiti sallapingaw iti baet dagiti adu nga arimpadek iti entablado a naggarawan dagiti agbibiag iti sarita. malagipmo ti kinasipnget ti agtutubo iti daan nga ili ket pagammuan, rabiin... (Manipud iti libro nga "Umayka Manen, Ganggannaet/Come Again, Stranger", koleksion dagiti napili a dandaniw iti Iluko ken Ingles ti autor) 
TI AUTOR:
Nobelista, mannaniw, sumasarita, translator, periodista. Tubo ti Siudad ti Laoag. Nagadal idiay University of the Philippines a nangalaanna iti BS in Foreign Service. Agdama nga empleado ti gobierno (iti Philippine Information Agency iti San Fernando, La Union) ken correspondent ti Philippine Daily Inquirer. Lecturer iti panagsurat ken panagiwarnak, agpapaay pay a hurado kadagiti pasalip iti Literatura Ilokana, ken kas maysa kadagiti mangibagbagnos iti GUMIL. Pasig a lallaki dagiti annakda ken ni Estelita Co ti Oscariz, Ramon, Isabela.
|
