© 1998 Burnay E-zine |
|
Tulbek ti dur-as
Tulbek ti panagdur-as ti tema Linabag tunggal plataporma Kandidato nga agbitla Tadem ti lapayag agkurri koma. Agalingasaw tayab ti politika Nagelgel a baraniw, agadiwaran angotna Agut-utek-kappi, aglulumbadan, kaka Nga umagek appoda nga agibumbunong grasia. L300 ni politiko nga umay makiinnabrasa Nagpintas, anian a daegna Iti nalap-ok a dana yasakna latta Ket iti nakersang a dakulap ni mannalon Makidinnakulap, awan alikaka. Ay, pinnulitika, bumarbara Kuarta, mitsat' panagaapa Sinnikap, punganay panangliput, kaka Ta ti parabur, saan a hustot' bingay ni kalanglanga. Adda pay naidumduma nga eksena Nagpintasen a plataporma Tulbek ti dur-as, ti panagkaykaysa Kadua isuna ta isu kano ket makamasa Ngem kabisadot' kaaduan aramidna Ni Lucifer ti kasinsinna! Adda pay slogan nga innak nabasa Baro a rupa, baro a namnama Ngem balinsuek kaniak ti kaipapananna Berdugo a langa, mantsado nga ima! Naamo a rupa, tulbek kano ti namnama Kabisadok a politiko dayta Pinadulan a nuang ti awagda kenkuana Ta simmurot metten kadagiti kaburburikna Baro a rupa, anian a bengbengna! Ay, dur-as `ton kaano aya Nga agtagilasag ken agtagitulangka No ti prinsipio ti tunggal maysa Agtamed lattat' sileng pirak a bumarbara? TI AUTOR: Taga-Brgy. Baresbes, Dingras, Ilocos Norte. Agtawen iti 23 ken baro pay. |
|
© 1998 Burnay E-zine |