|
basol
DANIW TI RINIWRIW SIGLO, WENNO KARARUAT' PANAWEN A LIMMASAT- NAGDALIASAT ITI DI NAPUOTAN A RABII, (A NAKALIPATAN TI TAO) KEN MAKAIDASAY A SIPNGET A NAKAULAWAN DAGITI AGKAKARUPA A KAPUTOTAN, NAARIWAWA, DI MAKAAWAT- DI MAAWATAN, GAPUT' IDADATENG DAGITI MAKAERRENG A DUSA A DUMUPAG ITI PIAT' BIAG TI KARARUA NGA AGRIGRIGAT (NATAWATAW SAN?) KEN AWAN KAPAYPAY-ANNA NGA ANGES TI DARA KEN LASAG A NAPNUAN MET TI KINAAWAN KEN DI MAIPALAWAG A PANNAKAADDA GAPU ITI SALUNGASING A LAPPED TI PANAGDUR-AS TI PANNAKAAMMO, WENNO KINASIRIB, NGA AGNGUDO AMIN ITI KINAAWAN SERBIT' PANNAKAITAO ITI LUBONG A NAKATAYAN DAYDI DATON NGA AGPAAY KADAGITI ISU MET LAENG A DI MAKAAWAT- DI MAAWATAN NGA AGBIBIAG ITI NGALAY TI GUNDAWAY NGA AWAN MET LAT' SERSERBINA A MAIPUON ITI KINAGANGGANNAET TI PANNAKAAMIRIS DAGITI BIDDUT TAPNO MAADDAAN SEREMONIA TI PUDNO A PANAGBABAWI A MANGISUBLIT' BIAG KEN ANGES ITI ISU MANEN A DARA KEN LASAG TI ESPIRITUAL WENNO DITAY AM-AMMO A KASASAAD NGA ISUNTO TI AGLASAT MANEN ITI KARARUAT' DI MAUNGPOT A PANAWEN WENNO SIGLO TI RINIWRIW A DANIW... basol... Karirikna adda latta met ket iliw iti kutit dagiti tagainep a naglaon iti anniniwanmo, sika, a diak maarakup... nupay simumulagaten iti sumipnget, itugawkon ti agmuttaleng; diakto malagip ti unnoy ti agpilpilit nga agsingpet, isu a kaar-arakupko tunggal agwaywayasak, kas ita: daniw ti iliw ti bugas ti ipatpategko a samiweng... mangpasag kano dagita ti bileg ti ladawan a napisang, kasla sarming a balitok, antolohia dagiti naiyaw-awana kaririknak, bukel ti rugso, kaandingay ti daan a buteng a kinawesan dagiti narugit a panid daydi panagsarimadeng ... ipapilitmo a dayta ti manglinged iti labus nga isip; di kad' data laeng ti nagkaules, dimngeg iti kansion? lakayen dagiti panagamak; nakarigrigat a tarayan dagiti aningaas ti malem wenno lemmengan ti rupa dagiti managinkukuna a henio, maibusor iti reyna ti kinaawan-nakem... panagbuteng nga insagut kadata dagiti aginkukuna; agaw-awis iti panagmaymaysa ti bagi, kallaysa ti bugbugtong a panagsipnget ket timtimak ti sam-it ken alsem dagiti sapata; maulila ti bara a maisagut iti nalpay, naupay... agawis latta ti siled a di pay naluktan ken ules a sikukupin... sika ngamin ti biag no nagpakadan ti panagtangken ni managsukisok iti sipnget... ngem aguray latta dagiti ima; sikat' anges ti din makaputot a gundaway, agmalaria ti mailiw a kaunggan ti malangisan a gasat: makibiang dagiti bulding a kaibaan iti lupot a mausar iti mailiw a riknak, ngamin, diak mapakadaan ti pannakabukel ti tunggal agsapa: pagammuan, adda manen ti iliw a saklot dagiti maladaga pay laeng a katawa, arimpadek ti sika manen nga il-ilalaen, ur-urayen; koronaankanto iti altar ti napugot nga unano, ari dagiti liday, sangkakammet a parke, sika ti nakaibugasanna, salakan ti di nabuniagan a panagliday... 
TI AUTOR: Nayanak ni John B. Buhay idi Enero 11, 1970 iti Bansing, Bayombong, Nueva Vizcaya. Tinurposna ti Christian Education idi 1990 iti Eveland Junior College idiay San Mateo, Isabela. Idi 1992, lineppasna ti Bachelor of Ministry iti Union Theological Seminary iti Cavite. Napalpasna pay ti Bachelor of Arts Major in Literature iti Aldersgate College iti Solano, Nueva Vizcaya. Sigud nga ordenado a Pastor iti United Methodist Church, agtaltalon ken agbangbangkag iti agdama. Isu ti agdama a presidente ti GUMIL Nueva Vizcaya. Adun a sarita, daniw, ken salaysayna ti naipablaak iti Bannawag ken dadduma pay a publikasion. Nagsursurat pay iti script iti drama iti radio ken iti komiks. Adu metten a gunggona ti inyalatna kadagiti nadumaduma a pasalip iti panagsuratan iti Literatura Iluko a pakairamanan ti Umuna a Gunggona iti umuna a Salip iti Avant Garde a Daniw nga Iluko idi 1995. Isu ti maysa kadagiti Fellow iti Daniw iti 1997 University of the Philippines National Writers Workshop a naangay idiay Baguio City. Addaanen iti bukod a pamilia ket addan maysa a bungada ken ni Emily a kaingungotna.
|
