|
Ruknoy kenka, Filipinas: Daniw
Bay-an nga iti sangkabassit a talugadingko, Siak nga aw-awaganda iti mannaniw, Ket mangidaton kenka, Filipinas, Kadagiti suratek a daniw... Daniw a mangiburuang iti timek Ti napalabas, agdama ken masakbayan Ken ikkis dagiti naumel a panunot Tapno mangngeg dagiti agintutuleng. Daniw a mangyaplag iti kinapudno A kinupin dagiti managparbo a konsensia Tapno mailemmeng ti agdama Kadagiti agbirbirok iti napalabas. Daniw a mangriing nakaturog a nakem A saan a makadlaw kadagiti awan bibiangna A bao a mangkurkurib-mangug-ugmok Iti sudi ken labon ti nakaparsuaan Nga isut' gapu panagangrag Dagiti agtubo pay nga agsapa. Daniw a mangaron pudot dara a mairurrurumen Tapno sumged apuy pakinakem ken beggang ti piskel A manguram kadagiti sinan-dios ken padidios Ket manen ken latta maitag-ay ken maitagbat Ti buneng kinabannuar a pinanday Nagkauna a kaputotan! 
TI AUTOR: Naipasngay ni Mary Jane Daligcon-Aragon idi Mayo 19, 1972 iti Cabaritan East, Ballesteros, Cagayan. Tinurposna ti BS in Information and Computer Science ken Master of Science in Information Tachnology iti St. Paul University iti Tuguegarao, Cagayan a pagpapaayanna kas computer instructor. Isu ti maysa kadagiti Fellow iti Daniw iti 1998 University of the Philippines National Writers Workshop a naangay iti Baguio City.
|
